La regenza grischuna ha nominà Susanna Gadient sco nova manadra da l'uffizi dal servetsch social chantunal. Ella vegn a surpigliar questa funcziun il 1. da mars 2016.
La regenza grischuna ha elegì Susanna Gadient sco nova manadra da l'uffizi dal servetsch social chantunal. Susanna Gadient ha 40 onns ed in diplom sco lic. fil. I. Ella lavura dapi l'onn 2008 tar l'uffizi dal servetsch social, dapi l'onn 2009 sco manadra dal ressort agid a persunas cun impediments e sco vicemanadra da l'uffizi. Avant sia entrada en l'administraziun chantunala ha Susanna Gadient lavurà durant plirs onns tar l'administraziun federala da finanzas. Ella daventa successura dad Andrea Ferroni che va – suenter ses engaschament da 27 onns sco manader da l'uffizi – en pensiun per la fin da favrer 2016.
L'uffizi dal servetsch social chantunal dal Grischun è il post spezialisà per incumbensas e per projects da la promoziun da las famiglias, da l'integraziun da persunas cun impediments, da la cussegliaziun sociala e da las prestaziuns tenor basegn. L'uffizi dal servetsch social dal Grischun maina servetschs socials en tut las regiuns dal chantun. Ultra da quai existan a Cuira servetschs socials spezialisads per la cussegliaziun tar dumondas da dependenza e per l'agid a victimas.
Fotografia agiuntada:
Susanna Gadient
Infurmaziuns:
cusseglier guvernativ Jon Domenic Parolini, schef dal departament d'economia publica e fatgs socials, tel. 081 257 23 01, e-mail: Jondomenic.Parolini@dvs.gr.ch
Gremi: regenza
Funtauna: rg chanzlia chantunala dal Grischun