L'emna passada ha l'iniziant Hans Hasler surdà a la regenza ina petiziun per augmentar la segirezza dal traffic sin la A13 en la regiun Valragn. Alura è vegnì fixà cuminaivlamain l'ulteriur proceder envers l'uffizi federal da vias (UVIAS).

Ils presidents da las vischnancas da Valragn, da Nufenen, da Spleia e da Sufers, la deputada Monika Lorez, il president cirquital Christian Schuhmacher sco er l'iniziant Hans Hasler han surdà a Cuira tut en tut 327 suttascripziuns, principalmain da la regiun Valragn. En il rom da la surdada han ils iniziants motivà lur pretensiun da prender mesiras per segirar il traffic sco limitas da tempo, scumonds da surpassar sco er ina regulaziun adequata da las stagnaziuns dal traffic. Ils iniziants han exprimì la gronda tema da la populaziun pertutgada concernent la segirezza dal traffic sin la A13.

Il cusseglier guvernativ Christian Rathgeb, accumpagnà dal secretari dal departament Daniel Spadin, da la scheffa da la polizia da traffic Barbara Hubschmid sco er da l'inschigner chantunal Reto Knuchel, ha mussà gronda chapientscha per quest giavisch. Ensemen han ins accordà ils ulteriurs pass. Il departament da segirezza vegn ad intervegnir tar l'uffizi federal da vias UVIAS, a suttastritgar questas pretensiuns ed a pretender stringentamain che las autoritads communalas pertutgadas vegnian integradas. La scheffa da la polizia da traffic ch'era preschenta, ha renvià a las mesiras immediatas che la polizia chantunala ha gia prendì. Ils iniziants èn stads d'accord cun il proceder fixà ed han engrazià per l'acceptaziun speditiva da lur giavischs.


Infurmaziuns:
Cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail: Christian.Rathgeb@djsg.gr.ch


Funtauna: rg departament da giustia, segirezza e sanadad
Funtauna: rg departament da giustia, segirezza e sanadad