Las responsablas ed ils responsabels per l'infurmaziun dals chantuns svizzers, da las citads e da la confederaziun han tschernì Cuira sco lieu per salvar lur radunanza generala da quest onn. Il program accumpagnant ha cumpiglià – ultra dal seminari davart il tema "Communicaziun da crisas 2.0 – Tge emprendain nus da l'attentat sin Charlie Hebdo?" – la visita da la citad veglia.

La conferenza svizra da l'infurmaziun en las administraziuns publicas (COSIAP) ha salvà sia radunanza generala annuala per l'emprima giada en il Grischun. Al seminari davart il tema "Communicaziun da crisas 2.0 – Tge emprendain nus da l'attentat sin Charlie Hebdo?" han discurrì referents da vaglia sco Jean-Marie Vernat, manader da la communicaziun da la citad da Paris, Xavier Alonso, schurnalist e correspundent da la Frantscha tar la "Tribune de Genève" e tar "24 Heures", sco er Ueli Zoelly, schef da la polizia d'eroport e Benedikt Scherer, vicemanader da la cooperaziun internaziunala da polizia tar l'uffizi federal da polizia (fedpol). La discussiun interessanta al podium ha procurà suenter per ina participaziun animada dals passa 50 profis da communicaziun.
Las participantas ed ils participants han er gì occasiun da visitar la citad veglia da Cuira. Sco engraziament per l'ospitalitad ha surdà Cristina Casanova, presidenta da la COSIAP, al president da la regenza Martin Jäger in schec da 1500 francs per sustegnair ina instituziun sociala en il Grischun. Martin Jäger ha purschì la donaziun a la chasa per dunnas dal Grischun (www.frauenhaus-graubuenden.ch).

Fotografia agiuntada: