L'uffizi da vischnancas envida oz suentermezdi a la segunda dieta da vischnancas en l'Arena a Cazas. Passa 200 represchentantas e represchentants d'autoritads da passa 90 vischnancas grischunas prendan part. La cussegliera guvernativa Barbara Janom Steiner profitescha da l'occasiun per infurmar las participantas ed ils participants davart las fatschentas currentas da ses departament. Plinavant vegnan tegnids differents referats specifics.

Circa 250 persunas sa scuntran en l'arena a Cazas e sa laschan infurmar davart ils temas relevants dal departament da finanzas e vischnancas (DFV). La cussegliera guvernativa Barbara Janom Steiner ha plaschair dal grond interess per ina tala dieta. Per ella èsi impurtant ch'il chantun e las vischnancas sa scuntrian sin il medem nivel e prendian per mauns las sfidas en il spiert da partenadi. Il federalissem saja ina fermezza essenziala da noss sistem statal e betg senza impurtanza en il chantun Grischun, quai che vegnia cumprovà tras la gronda autonomia communala. La scheffa dal DFV infurmescha davart il stadi da realisaziun da la refurma da vischnancas e dal territori sco er da la refurma da la gulivaziun da finanzas, ma er davart ils svilups en il sectur da las taglias ed en il sectur da las finanzas chantunalas e communalas. Sco ministra da finanzas profitescha ella er da la chaschun da referir davart ils svilups e davart las discussiuns politicas da la gulivaziun da finanzas naziunala.

Dus manaders d'uffizis chantunals infurmeschan las autoritads preschentas davart las fatschentas currentas da lur uffizis ed illustreschan ils pleds da la cussegliera guvernativa Barbara Janom Steiner. Il manader da l'uffizi da vischnancas Thomas Kollegger dat ina survista davart il stadi dal nov model armonisà da contabilitad MAC2, davart la constituziun da las 11 novas regiuns sco er davart la nova surveglianza da las finanzas che spetga las vischnancas a partir da l'onn 2016. La nova concepziun da surveglianza è in sistem da preavertiment per identifitgar fauss svilups finanzials, e l'uffizi da vischnancas po puspè avair in effect da sustegn. Las cleras responsabladads areguard las obligaziuns da las vischnancas na vegnan dentant betg eliminadas.

Infurmaziuns actualas davart ils svilups en il sectur fiscal dat Urs Hartmann, manader da l'administraziun chantunala da taglia. Plinavant referescha dr. Ursin Fetz, manader dal center per management d'administraziun a la scola auta da tecnica ed economia Cuira, davart in instrument pluridimensiunal per mesirar il success da fusiuns da vischnancas (check da fusiuns). Dal center per democrazia Aarau (ZDA) dastga vegnir beneventà dr. Philippe Koch. El rapporta davart l'effect da fusiuns da vischnancas sin la democrazia locala.


Infurmaziuns:
- cussegliera guvernativa Barbara Janom Steiner, scheffa dal departament da finanzas e vischnancas dal Grischun, e-mail: Barbara.Janom@dfg.gr.ch (ella telefona lura enavos)
- Simon Theus, vicemanader da l'uffizi da vischnancas, manader da la partiziun "projects", tel. 079 306 71 72, e-mail: Simon.Theus@afg.gr.ch


Gremi: departament da finanzas e vischnancas
Funtauna: rg departament da finanzas e vischnancas