La regenza grischuna ha elegì Martin Gredig sco nov cusseglier da la banca chantunala grischuna. Per il 1. d'avrigl 2016 daventa el successur da Peter Wettstein.

Tenor la lescha davart la banca chantunala grischuna (BCG) è la regenza cumpetenta d'eleger il cussegl da banca che sa cumpona da set persunas. Ils 31 da mars 2016 va a fin la perioda d'uffizi dal vicepresident da la banca Peter Wettstein (dapi 2002 en il cussegl da banca e dapi 2009 vicepresident). El ha cuntanschì la limitaziun dal temp d'uffizi prescritta da 12 onns e sto vegnir remplazzà. Sco cusseglier da banca vegn Peter Wettstein remplazzà tras Martin Gredig da Tumein. Quel è vegnì elegì da la regenza per la perioda d'uffizi dal 1. d'avrigl 2016 als 31 da mars 2020. Cun eleger Martin Gredig vegn fatg in ulteriur pass en la renovaziun instradada dal cussegl da banca.

Martin Gredig ha 50 onns ed è burgais da Val Stussavgia. El è maridà ed abita cun sia famiglia a Tumein. Suenter la scola chantunala a Cuira ha el fatg il licenziat da scienzas economicas l'onn 1994 a l'universitad da Turitg. L'elecziun da Martin Gredig è vegnida fatga sin fundament da sia experientscha cumprovada da blers onns sco expert da finanzas che ha lavurà en differentas branschas. Tar sias activitads da fin ussa, tranter auter a Soloturn, a Puschlav ed a Cuira, è el s'acquistà enconuschientschas profundas en il sectur da bancas, d'energia e da traffic. Latiers tutgan er experientschas en differents cussegls d'administraziun e da fundaziun sco er en cumissiuns da federaziuns da branscha svizras. Dapi l'onn 2012 è Martin Gredig manader da la partiziun "finanzas" e commember da la direcziun da la Viafier retica a Cuira.

La renovaziun dal cussegl da banca ch'è adina puspè necessaria ademplescha las prescripziuns da l'autoritad federala per la surveglianza dals martgads da finanzas FINMA ed il profil d'exigenzas da la regenza per il cussegl da banca. Las pretensiuns envers il cussegl da banca sco tal, envers ses singuls commembers ed envers il presidi da la banca ha la regenza repassà l'onn 2013 ed adattà ellas a las prescripziuns dal dretg da surveglianza.

Fotografia agiuntada: Martin Gredig


Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas dal Grischun, tel. 081 257 32 01


Gremi: regenza
Funtauna: rg chanzlia chantunala dal Grischun