Suenter passa quatter onns po il chantun Grischun far ina bilantscha positiva da ses engaschament a favur da l'agroturissem. En l'agroturissem occupa il Grischun ina da las emprimas posiziuns: La commerzialisaziun cuminaivla dals servetschs d'agroturissem è unica en l'entira Svizra.

Las puras ed ils purs grischuns carmalan ils giasts cun diversas purschidas, per exempel cun passa 130 purschidas da pernottar, cun 18 aventuras da trekking cun animals u er cun 7 pitschnas ustarias sin ils bains purils. Per ils circa 150 bains purils èn quests servetschs ina contribuziun supplementara bainvegnida a las entradas. Ma els èn er in punct da referiment per auters furniturs da prestaziuns dal turissem grischun. La buna collavuraziun cun l'organisaziun da marketing Grischun vacanzas ha producì sinergias. Las valurs "autentic, agreabel, cun vast orizont" da la marca Grischun vacanzas èn vegnidas rinforzadas cun simpaticas purschidas professiunalas.

Orientaziuns als giasts spezialmain tras las puras
Entaifer quatter onns ha il chantun Grischun pudì gidar considerablamain a professiunalisar l'agroturissem. L'orientaziun als giasts tras ils manaschis agriculs grischuns è ina realitad che vegn vivida spezialmain da las puras. Ellas porschan lur prestaziuns sin la plattafurma d'internet da Grischun vacanzas (www.graubuenden.ch/bauernhof). La commerzialisaziun cuminaivla cun ina excellenta survesaivladad da las purschidas è unica en Svizra. Las purschidas d'aventura e da pernottar èn multifaras ed originalas, uschia èsi per exempel pussaivel d'experimentar la vita dals pasters sin l'alp Glivers, da frequentar in'abitaziun da vacanzas che permetta d'avair contact cun vatgas en l'Engiadina bassa sco er da far in trekking cun chauras a Pany. Tut quests manaschis èn plazzas, nua ch'i vegn mussà co ch'i vegn lavurà en l'agricultura e betg mo fatschadas decoradas cun vatgas da plastic.

L'agroturissem sco nischa attractiva
Il project "agroturissem dal Grischun" è vegnì lantschà il matg 2011. Curt suenter ha il secretariat "agroturissem dal Grischun" cumenzà cun sia lavur. Sia finamira era quella da stgaffir purschidas turisticas autenticas e cudeschablas che han in connex cun l'agricultura. Per quest intent ha il chantun empruvà da cuntanscher in sustegn professiunal ed ina colliaziun tranter ils acturs, ina furma d'organisaziun optimala ed ina meglra commerzialisaziun da las purschidas agroturisticas. Sco che la bilantscha dal chantun mussa han questas finamiras per gronda part pudì vegnir realisadas. La creschientscha modesta dal dumber da purschiders d'agroturissem mussa dentant ch'il potenzial è vegnì survalità in pau. La gronda part dals circa 2300 manaschis agriculs en il chantun è cunzunt ina profi sin ses champ tradiziunal. L'agroturissem è dentant ina nischa zunt attractiva. Ils purschiders existents valiteschan l'agroturissem per gronda part sco rentabel fin fitg rentabel. Els gudognan tenor atgnas indicaziuns passa 10 pertschient da las entradas cun l'agroturissem.

La fin da l'onn va il project per lantschar l'agroturissem a fin. Ma i vegn proseguì vinavant cuminaivlamain en l'agroturissem ed i dat vinavant ina cumparsa cuminaivla. Concentrar las purschidas da pernottar e da seminaris, da las pitschnas ustarias sin ils bains purils, da las vacanzas sin ils culms u da las aventuras da trekking cun animals vegn fatg a partir dal 1. da schaner 2016 da l'uniun agroturissem dal Grischun che vegn purtada da puras e purs.


Persunas da contact
- cusseglier guvernativ Jon Domenic Parolini, schef dal departament d'economia publica e fatgs socials, tel. 081 257 23 01, e-mail: Jondomenic.Parolini@dvs.gr.ch  
- Daniel Buschauer, manader da l'uffizi d'agricultura e da geoinfurmaziun, tel. 081 257 24 31, e-mail: Daniel.Buschauer@alg.gr.ch  


Gremi: departament d'economia publica e fatgs socials
Funtauna: rg departament d'economia publica e fatgs socials