La regenza grischuna mantegna da princip il model existent da l'organisaziun poliziala en il chantun Grischun. Las structuras existentas èn sa cumprovadas. La regenza approvescha il rapport da polizia "Polizia dal Grischun 2015plus" e concluda mesiras per l'ulteriur svilup.

Il rapport "Polizia dal Grischun 2015plus" ch'è vegnì redigì per incumbensa da la regenza analisescha la dumonda politica e poliziala ch'exista dapi circa set onns da realisar ina polizia unitara per il chantun Grischun. El examinescha, sch'ins duai mantegnair il model da collavuraziun existent tranter la polizia chantunala e las vischnancas ubain sch'ins duai midar la structura e sch'il chantun duai surpigliar las incumbensas da la polizia communala. Il rapport sa basa sin in'analisa da la situaziun actuala, plinavant èsi vegnì fatg ina cumparegliaziun cun las structuras d'organisaziun d'auters chantuns e mesiras concretas èn vegnidas elavuradas.

Voluntariadad empè da prescripziuns legalas
Il rapport "Polizia dal Grischun 2015plus" mussa ch'il sistem da polizia dal chantun Grischun resguarda gia ils giavischs essenzials ch'èn colliads cun la noziun da la polizia unitara. Il sistem da polizia dal Grischun sa lascha senza auter cumparegliar cun organisaziuns ch'èn vegnidas realisadas dacurt en auters chantuns sut la noziun da la polizia unitara. Il sistem da polizia dal Grischun sa basa dentant sin voluntariadad e betg sin prescripziuns legalas stringentas. La structura vertenta cun ina separaziun da las incumbensas tranter la polizia chantunala e la polizia communala è sa cumprovada. Perquai duai la collavuraziun tranter las vischnancas e la polizia chantunala vegnir concepida vinavant cun agid da cunvegnas contractualas. Las vischnancas han uschia la pussaivladad da surdar lur incumbensas polizialas sin basa voluntara a la polizia chantunala. Viceversa ha dentant er il chantun la pussaivladad da delegar en cas excepziunals incumbensas da la polizia chantunala a las vischnancas.

Mesiras per optimar la collavuraziun
Il rapport da polizia prevesa differentas mesiras per optimar ulteriuramain la collavuraziun tranter il chantun e las vischnancas. Uschia duai la responsabladad che las vischnancas han per lur territori pertutgant il sectur da la polizia da segirezza vegnir accentuada cleramain e la situaziun giuridica gia existenta duai daventar pli chapaivla. Sco ulteriura mesira duain las soluziuns contractualas cun las vischnancas vegnir promovidas anc dapli, particularmain en connex cun fusiuns da vischnancas ed en connex cun la regiunalisaziun d'incumbensas communalas. Las structuras regiunalas duain vegnir rinforzadas er territorialmain. Ultra da quai sto vegnir cuntinuada ed optimada la cooperaziun cun la polizia da la citad da Cuira. Per quest intent è vegnì cumplettà il contract da collavuraziun.


Infurmaziuns:
cusseglier guvernativ dr. Christian Rathgeb, schef dal departament da giustia, segirezza e sanadad, tel. 081 257 25 01, e-mail: Christian.Rathgeb@djsg.gr.ch


Gremi: departament da giustia, segirezza e sanadad
Funtauna: departament da giustia, segirezza e sanadad