A partir dals 5 da schaner 2016 cumpara il fegl uffizial dal chantun Grischun mo pli en furma electronica. Sut www.kantonsamtsblatt.gr.ch vegnan messas en l'internet anc quel di tut las publicaziuns uffizialas. In abunament na dovri betg pli; il fegl uffizial digital è gratuit.

A partir dals 5 da schaner 2016 cumpara il fegl uffizial dal chantun Grischun da nov mo pli en furma electronica. Tut las publicaziuns uffizialas, en spezial dal chantun, da las regiuns, dals districts, dals circuls e da las vischnancas, ma er publicaziuns privatas cumparan anc quel di sin la pagina d'internet dal chantun. Da nov na dovri betg pli in abunament, il fegl uffizial digital è gratuit ed igl è pussaivel da l'utilisar senza login sin tut ils apparats finals digitals (smartphone, tablet, computer). La nova pagina è survesaivla e simpla d'applitgar. Svelt e lev chattan ins las publicaziuns chantunalas, las infurmaziuns davart il register da commerzi, ils inserats da plazzas ed auter pli. Ina funcziun da tschertga attractiva permetta da chattar las infurmaziuns cun cleras finamiras tenor differents criteris (p.ex. tenor periodas, domenas u instituziuns) ed ils resultats persunalisads pon vegnir abunads levamain e gratuitamain. Il fegl uffizial digital As infurmescha alura da tut temp e dapertut automaticamain davart la cumparsa da publicaziuns interessantas.

En l'avegnir consegnan las persunas interessadas lur cuntegns independentamain online. Sur in formular pratic èsi pussaivel da registrar inserats svelt e simpel cun agid da models, e quai senza rupturas tranter ils mediums. Ils inserents profitan qua da cundiziuns pli favuraivlas. Sut www.kantonsamtsblatt.gr.ch stat a disposiziun a partir d'immediat ina versiun d'emprova dal fegl uffizial digital che permetta als interessents ed als lecturs d'applitgar limitadamain funcziuns impurtantas. Faschai in test dal nov product en quest rom. La versiun d'emprova n'è natiralmain betg giuridicamain lianta.

La tendenza da remplazzar stampats cun soluziuns digitalas cuntinuescha e s'intensivescha. Il fegl uffizial electronic permetta da publitgar anc quel di las infurmaziuns, e quai grazia ad ina flexibilitad supplementara. Ultra da quai vegn amplifitgada considerablamain la distribuziun da las publicaziuns. Ussa èsi necessari da midar per la soluziun digitala per pudair mantegnair a lunga vista quest organ da publicaziun chantunal impurtant ed uffizial.

En collavuraziun cun Somedia ha il fegl uffizial dal chantun Grischun pudì vegnir realisà en ina versiun online moderna e chapaivla. La Somedia è la partenaria da contract dal chantun. Sco interpresa generala è ella responsabla per il manaschi tecnic e per il mantegniment sco er per la redacziun, per la producziun e per la distribuziun dal fegl uffizial digital. L'experientscha da plirs onns da l'interpresa cun l'ediziun stampada dal fegl uffizial sco er las enconuschientschas existentas en il sectur digital ha Somedia tratg a niz per producir ina soluziun innovativa. Il nov fegl uffizial dal chantun Grischun è ina prestaziun da piunier ed unica en l'entira Svizra.

Sin nossa pagina d'internet As orientescha er in film curt davart ils avantatgs dal nov product.


Infurmaziuns:
-dr. Claudio Riesen, chancelier, tel. 081 257 22 21, e-mail: Claudio.Riesen@staka.gr.ch   
-Ralf Seelig, Somedia Production SA, tel. 081 255 54 56, e-mail: ralf.seelig@somedia.ch


Gremi: chanzlia chantunala
Funtauna: rg chanzlia chantunala