A Landquart è vegnì avert oz uffizialmain il nov center administrativ regiunal dal chantun Grischun. Tschintg posts da servetsch chantunals cun circa 50 plazzas da lavur èn da nov concentrads en in lieu. Patruna da construcziun è la fundaziun Ehmann Savognin. Il nov edifizi è vegnì planisà e construì entaifer 2 onns tras la Implenia Svizra SA.

La strategia chantunala d'immobiglias prevesa en tut il Grischun tut en tut nov centers regiunals en lieus che furman gia ussa centers administrativs. Ils emprims centers a Glion, Roveredo, Tusaun, Tavau e Scuol èn gia en funcziun ed èn sa cumprovads en la pratica. Ils proxims onns suondan ils centers a Cuira, Samedan e Puschlav.
En il nov edifizi administrativ a Landquart vegnan centralisads tschintg posts da servetsch cun circa 50 plazzas da lavur ch'eran repartidas fin ussa en trais differents lieus. I sa tracta dal servetsch psicologic da scola, da l'inspecturat da scola Val dal Rain-Partenz-Tavau, dal servetsch social Partenz/Signuradi/Tschintg Vitgs, da l'uffizi da guaud e privels da la natira e da la polizia chantunala. Grazia a la reuniun pon vegnir tratgas a niz sinergias impurtantas e spargnads custs.

Edifizi administrativ nov e modern
Il nov edifizi sa chatta directamain sper la staziun da Landquart al Bahnhofplatz 3B/3C. La Viafier retica SA ha mess a disposiziun il terren en il dretg da construcziun. Finanzià il project ha la fundaziun Ehmann Savognin. L'incumbensa da construir l'edifizi ha gì la Implenia Svizra SA cun ils architects Jüngling + Hagmann. Il chantun ha retratg il cumenzament d'october sias localitads en il plaunterren sco er sin il 1. e 5. plaun. En quest edifizi han er la Repower SA e l'uffizi dal register funsil Landquart lur biros.
Il stabiliment sa distingua tras ina moda da construcziun funcziunala e persistenta e tras ina furma cumpacta. La purschida da localitads da lavur che correspunda als basegns, l'accessibladad optimala, l'observaziun d'autas pretensiuns envers la qualitad da la construcziun d'edifizis cun mirs exteriurs bain isolads, ma er la moda da construcziun ecologica (standard da Minergie®) furman la basa per in edifizi administrativ effizient e progressiv. Grazia a l'engaschament ed a la collavuraziun excellenta tranter la patruna da construcziun, ils utilisaders, ils planisaders, las interpresas e la Viafier retica SA han las finamiras dal project pudì vegnir cuntanschidas tant en quai che reguarda la qualitad, ils custs sco er ils termins.

Fotografia agiuntada:

Il nov center administrativ regiunal a Landquart, fotografia da dador.


Infurmaziuns:
Markus Dünner, architect chantunal, uffizi da construcziun auta, tel. 081 257 36 31, e-mail: Markus.Duenner@hba.gr.ch
 

Gremi: uffizi da construcziun auta dal Grischun
Funtauna: rg uffizi da construcziun auta dal Grischun