En sia ultima sesida ha la regenza prendì posiziun tar la revisiun da l'ordinaziun davart ils servetschs da telecommunicaziun. Ultra da quai ha ella relaschà ella il plan d'instrucziun per il rom rumantsch sco lingua da scola ch'è ina part dal Plan d'instrucziun 21.

La regenza prenda posiziun tar la revisiun da l'ordinaziun davart ils servetschs da telecommunicaziun
La regenza grischuna ha prendì posiziun tar la revisiun parziala da l'ordinaziun davart ils servetschs da telecommunicaziun (OST). Tenor il nov sboz da la OST èsi previs ch'il provediment da basa cumpiglia in attatg d'internet cun ina rata da transmissiun d'almain 3000/300 kbit/s. La concessiunaria dal provediment da basa po reducir la dimensiun da las prestaziuns en cas excepziunals, sche la colliaziun na permetta betg da metter a disposiziun il servetsch menziunà per motivs tecnics u economics.
La regenza grischuna refusa questa regulaziun. En il rom da la concessiun dal provediment da basa stoi esser segirà ch'il provediment da basa saja garantì per tut ils circuls da la populaziun en tut las parts da la Svizra. Cun la disposiziun d'excepziun n'adempliss il cussegl federal betg questa incumbensa formal-legala. L'augment da la dimensiun da 2000/200 kbit/s a 3000/300 kbit/s saja bain in pass en la dretga direcziun. En vista als svilups tecnics saja el però memia pitschen e na saja ultra da quai betg garantì pervia da la pussaivladad da far excepziuns. Per quai pretenda la regenza dal chantun Grischun ch'i vegnia garantì – almain en ils territoris abitads – in provediment cun internet cun ina rata da transmissiun da 5000/500 kbit/s.

Plan d'instrucziun 21: Metter en vigur il plan d'instrucziun per il rom rumantsch sco lingua da scola
La regenza grischuna relascha il plan d'instrucziun per il rom rumantsch sco lingua da scola sco er tschertas parts dals plans d'instrucziun da lingua. Il plan d'instrucziun per il rom rumantsch sco lingua da scola vegn mess en vigur il medem mument sco l'entir Plan d'instrucziun 21 Grischun probablamain per l'onn da scola 2018/19.
Cun la deliberaziun dal plan d'instrucziun per il rom rumantsch sco lingua da scola vegni pussibilità d'elavurar il med d'instrucziun da lingua en ils idioms sin ina basa lianta. La regenza ha approvà l'avrigl 2015 l'elavuraziun d'in med d'instrucziun da lingua per la 2. fin la 9. classa en ils idioms. Il plan d'instrucziun 21 sa tegna vi dal princip che la vischnanca decida en cas da scolas rumantschas, tge lingua d'alfabetisaziun che duai vegnir instruida. En scolas cun ina instrucziun idiomatica na datti naginas cumpetenzas da basa per il rumantsch grischun. Sin il stgalim secundar I survegnan er las scolaras ed ils scolars da questas scolas l'occasiun dad udir e da leger texts en rumantsch grischun ed en ulteriurs idioms.
Ulteriuras infurmaziuns davart il plan d'instrucziun 21 en il Grischun

Realisaziun da l'incumbensa dal cussegl grond concernent il concept general "Deponias da material da stgavament"
La regenza grischuna ha prendì enconuschientscha dal rapport "Spazi da deponia per material da stgavament net (terren e sutterren) en il chantun Grischun, analisa da la situaziun" e dal catalog da mesiras "Tractament da material da stgavament net (terren e sutterren)" da l'uffizi per la natira e l'ambient. L'incumbensa Conrad ch'è vegnida inoltrada durant la sessiun da zercladur 2011 ha pretendì in'analisa da la situaziun e la garanzia da stgaffir deponias regiunalas en ina dimensiun suffizienta. Dapi l'inoltraziun da l'incumbensa è vegnì fixà en il plan directiv en l'entir chantun tut en tut in volumen da deposit da 3 188 000 m3 Da quel èn gia 1 325 000 m3 approvads ed en funcziun. Ultra da quai èn vegnids integrads en ils plans directivs regiunals ulteriurs lieus da deposit da 3 605 000 m3. La regenza grischuna ha constatà che parts essenzialas dal concept da mesiras èn gia realisadas u èn vegnidas prendidas per mauns. In pèr mesiras ston anc vegnir realisadas. Tranter auter duai vegnir elavurada per l'entir chantun ina charta da lieus che s'adattan sco lieus da deponia pussaivels. Ultra da quai duai vegnir stgaffida ina pagina d'internet che infurmescha davart ils proxims lieus da deposit, davart lur datas da contact, davart il material che dastga vegnir deposità là e davart lur volumen che stat actualmain a disposiziun.

Approvà il project d'ina via da guaud en il Dürrwald da Tavau
La regenza grischuna approvescha il project d'ina via da guaud en il Dürrwald da la vischnanca da Tavau e conceda ina contribuziun chantunala da maximalmain 1 585 980 francs.
Il territori da guaud al nordvest da Laret sut, l'uschenumnà Dürrwald, è determinà per gronda part sco guaud da protecziun. El protegia il territori d'abitadi, la via chantunala e la lingia da la Viafier retica cunter lavinas, cunter crudada da crappa e cunter bovas. Ultra da quai adempleschan quests guauds er ina funcziun impurtanta per l'utilisaziun da laina e per la protecziun da la natira. Per garantir duraivlamain questas funcziuns dal guaud ston ils guauds vegnir tgirads e cultivads correspundentamain. Actualmain èsi pussaivel d'entrar en quests guauds mo sur ina via charrabla stretga e fitg stipa. Questa via n'è betg adattada per la cultivaziun dal guaud. La finamira dal project è perquai quella da construir da nov 2587 m e dad engrondir 800 m vias da guaud uschia ch'ellas pon vegnir duvradas da camiuns.

La regenza approvescha la revisiun parziala da la planisaziun locala da Scuol
La revisiun parziala da la planisaziun locala, concludida ils 9 da favrer 2014 da l'anteriura vischnanca da Ftan (en il fratemp fusiunada a la vischnanca da Scuol), vegn approvada da la regenza cun resalvas.
Mez da l'onn 2010 è l'anteriura chasa da persunal da l'hotel "Scuol Palace" en il territori "Nairs" arsa cumplettamain. Fin oz n'è betg vegnì realisà in edifizi cumpensatoric. Il proprietari dal bain immobigliar pertutgà vuless ussa construir in nov edifizi cumpensatoric sco edifizi d'abitar e da mastergn. Pervia da las stretgas relaziuns da spazi e pervia dal meglier access planisà èsi necessari da spustar il lieu da construcziun per 20 fin 30 meters en direcziun nordost. Quai premetta che la zona d'abitar e da mastergn vegnia engrondida per circa 987 m2.

© Comet Photoshopping GmbH / Dieter Enz


Gremi: regenza
Funtauna: rg chanzlia chantunala dal Grischun