Il dumber da requirentas e requirents d'asil ch'èn vegnids attribuids ils ultims mais als chantuns ed uschia er al Grischun è creschì massivamain e resta sin in nivel constantamain aut. Per garantir la collocaziun da questas persunas ha la regenza perquai decidì mesiras immediatas e prenda en locaziun immobiglias a Mustér ed a Trimmis. Per augmentar a curta vista la capacitad da collocaziun vegnan plinavant manads stabiliments temporars a Valchava ed ad Andeer.
Quest onn èn vegnids attribuids al chantun fin la fin d'october 814 novas requirentas e novs requirents d'asil. Talmain bleras fugitivas e fugitivs n'hai betg pli dà en il Grischun dapi il cumenzament dal conflict dal Cosovo a la fin dals onns 90. Er l'onn proxim sto il Grischun far quint ch'il dumber da requirentas e requirents d'asil attribuids al chantun saja almain tuttina aut.
La strategia da la regenza prevesa che las requirentas ed ils requirents d'asil attribuids al chantun vegnian collocads en alloschis collectivs manads dal chantun. Ultra dals centers ordinaris – vul dir ils centers per l'emprima registraziun resp. ils centers da transit a Cazas, Cuira, Laax, Schluein e Tavau – vegnan actualmain duvrads stabiliments da protecziun civila sutterrans a Cuira ed a Domat sco alloschis d'urgenza. Perquai ch'er las capacitads da quests stabiliments èn bunamain exaustas, ha la regenza concludì da metter a disposiziun ulteriurs alloschis. Quai sco mesira immediata per garantir la capacitad d'admissiun e da collocaziun.
Ultra dal center da transit Valbella a Litzirüti, ch'è gia prendì en locaziun, duain l'hostel Cucagna (anteriur hotel Bellavista) a Mustér e l'hotel Bahnhof a Trimmis vegnir affittads sco centers collectivs. Tras l'utilisaziun da quests centers da transit supplementars duain sche pussaivel vegnir reducidas las collocaziuns d'urgenza en stabiliments da protecziun civila. Plinavant vegni examinà, sche ulteriurs alloschis vegnissan en dumonda. A curta vista vegn la capacitad da collocaziun augmentada supplementarmain cun utilisar temporarmain in stabiliment da protecziun civila en la vischnanca d'Andeer ed in alloschi da gruppas existent a Valchava en la vischnanca da Val Müstair.
Cuntrari a la maioritad dals auters chantuns, che attribueschan las requirentas ed ils requirents d'asil directamain a las vischnancas, resta il Grischun er vinavant tar ses concept da collocaziun e d'assistenza. Per mantegnair la segirezza pretenda el che la confederaziun rinforzia evidentamain il corp da guardias da cunfin (Cgcf) ed il servetsch d'infurmaziun da la confederaziun (SIC).
Infurmaziuns:
- cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail:
Christian.Rathgeb@djsg.gr.ch
- Marcel Suter, manader da l'uffizi da migraziun e da dretg civil, tel. 079 331 66 62, e-mail:
Marcel.Suter@afm.gr.ch
Gremi: regenza
Funtauna: rg chanzlia chantunala dal Grischun