En sia sesida ha la regenza approvà la cunvegna cun las Viafiers federalas per deviar aua dal Reno di Medel. Ultra da quai ha ella concedì contribuziuns per sanar la chasa da scola e da guaud da la scola alpina Avrona e per renovar il bogn da cura Andeer.

Approvaziun da la cunvegna cun las Viafiers federalas per deviar aua dal Reno di Medel
La regenza ha approvà la cunvegna tranter il chantun Grischun e las Viafiers federalas svizras (VFF) pertutgant la deviaziun d'aua dal Reno di Medel or da la Val Cadlimo en il territori dal chantun Tessin.
Las VFF han l'intenziun da renovar e d'engrondir lur ovra electrica existenta Ritom en il chantun Tessin. Il volumen d'investiziun importa 200 fin 300 milliuns francs. Dapi l'onn 1930 utiliseschan las VFF l'aua dal Reno di Medel en l'ovra electrica Ritom. L'aua deviada reducescha però las pussaivladads da duvrar l'aua dal reno di Medel en las ovras electricas grischunas per lung dal Rain anteriur respectivamain en l'ovra electrica da Domat. Ina cunvegna correspundenta che datescha da l'onn 1963 e che vala anc fin l'onn 2043 furma la basa actuala da questa deviaziun d'aua. En il rom da las lavurs da renovaziun e d'engrondiment da l'ovra electrica Ritom vegn la cunvegna ussa renovada anticipadamain.
Grazia al fatg ch'il nov dretg d'utilisaziun vegn concedì ad ura, duain las vischnancas grischunas pertutgadas survegnir da las VFF ina taxa da concessiun ed il chantun Grischun ina taxa dal stadi. Previsa en quest connex è ina indemnisaziun unica da mintgamai 288 508 francs. L'import per las vischnancas duai vegnir repartì proporziunalmain en relaziun cun la forza idraulica brutta concedida. Plinavant è previsa ina indemnisaziun unica da totalmain 3 milliuns francs, perquai che las vischnancas ed il chantun renunzian da sa participar a la Ritom SA ed ad in eventual dretg da return dals implants a la concedanta. Quella indemnisaziun duai er vegnir repartida mintgamai per la mesadad sin las vischnancas e sin il chantun.

Nova submissiun da la centrala operativa dal clom d'agid sanitar 144
La regenza ha desditg il contract cun l'ospital regiunal da la Surselva per la gestiun da la centrala operativa dal clom d'agid sanitar 144. Cun la desditga per ils 31 da december 2017 e cun la nova submissiun da l'incumbensa vul il chantun pussibilitar er ad auters interessents da s'annunziar per la gestiun da la centrala operativa dal clom d'agid sanitar. Quai en il senn da la lescha da submissiun che duai promover la concurrenza tranter ils purschiders. La publicaziun da la submissiun ha probablamain lieu l'emprima mesadad da l'onn 2016.
La centrala operativa dal clom d'agid sanitar a Glion ha cumenzà cun sia activitad la stad 1999. La regenza aveva dà a l'ospital regiunal da la Surselva ina incumbensa correspundenta ils 16 da december 1997.

Sanaziun da la chasa da scola e da guaud Avrona
La regenza grischuna ha approvà il project per sanar la chasa da scola e da guaud da la fundaziun da la scola alpina Avrona. Ella ha deliberà ina contribuziun chantunala da construcziun da maximalmain 1,26 milliuns francs. Las lavurs da construcziun planisadas cumpiglian oravant tut la sanaziun termica dals mirs exteriurs e la renovaziun dals indrizs da la tecnica da chasa.
La scola alpina Avrona a Tarasp è ina instituziun da la scolaziun speziala renconuschida. Tenor la lescha chantunala da scola paja il chantun a las instituziuns da la scolaziun speziala contribuziuns da construcziun tenor las disposiziuns da la lescha chantunala davart l'integraziun sociala e professiunala da persunas cun impediments.

Contribuziuns da la confederaziun e dal chantun per la renovaziun dal bogn da cura Andeer
Cun resalva d'ina finanziaziun totala segirada vegn concedì – en il rom da la nova politica regiunala da la confederaziun (NPR) – in emprest da 740 000 francs a la Bogn da cura Schons Andeer SA per la renovaziun dal bogn da cura Andeer. Ultra da quai vegn garantida ina contribuziun chantunala da 124 571 francs.
Cun renovar il sectur dals batschigls interns sco er da las gardarobas e da las duschas duai vegnir terminada la renovaziun totala dal bogn da cura ch'è vegnida cumenzada avant in pèr onns. La finamira da la renovaziun è quella da porscher als giasts ina impressiun generala unitara cun duvrar las medemas materialias natiralas davent da l'entrada fin al sectur extern. Cun renovar il bogn da cura po il potenzial da valurisaziun vegnir duvrà meglier e novas gruppas en mira pon vegnir attratgas. Da quest augment da l'attractivitad vegnan er a profitar ils ulteriurs purschiders turistics da la regiun.

Nova construcziun da la basa per il mantegniment da las vias da l'uffizi da construcziun bassa a Puschlav
Cun cundiziuns e cun permissiuns ha la regenza approvà il project d'exposiziun per construir da nov la basa per il mantegniment da las vias da l'uffizi da construcziun bassa a Puschlav. L'edifizi nov pratic cuntinuescha cun la tipologia da basas per il mantegniment da las vias che han in concept unitar pertutgant la furma, la funcziun e la materialisaziun. La construcziun nova en la fracziun da Li Curt duai vegnir cumplettada cun ina via da controlla per vehichels. Uschia vegnan meglieradas considerablamain las relaziuns da spazi e las premissas per ademplir efficaziamain ed economicamain las incumbensas dal servetsch per il mantegniment da las vias e da l'uffizi per il traffic sin via. Ils custs per il nov edifizi vegnan calculads cun 5 milliuns francs. La basa per il mantegniment da las vias existenta na correspunda betg pli a las pretensiuns modernas, saja quai areguard la grondezza, la realisaziun architectonica u l'equipament tecnic.

Revisiuns parzialas da la lescha davart las vias e da l'ordinaziun davart las vias entra en vigur
Las revisiuns parzialas da la lescha davart las vias e da l'ordinaziun davart las vias dal chantun Grischun vegnan messas en vigur per il 1. da schaner 2016. Cun quai vegn meglierada tranter auter la coordinaziun da las proceduras. Uschia vegn per exempel autorisada la regenza da pudair conceder – en il rom da l'approvaziun da projects da vias – il medem mument er tut las autras permissiuns necessarias.


Gremi: regenza
Funtauna: rg chanzlia chantunala dal Grischun