Suenter in temp da dus onns pon las lavurs da reparaziun da la punt sur il Rain a La Punt/Rehenau vegnir terminadas uffizialmain. En preschientscha da cusseglier guvernativ Mario Cavigelli vegn la punt sanada preschentada oz a la populaziun.

La punt da l'onn 1881, ina construcziun da travs da fier, aveva tipics donns da corrosiun en diversas parts. Ultra da quai vegniva la construcziun purtanta d'atschal protegida mo insuffizientamain da la platta da betun dal vial betg isolada.

Cun la finamira da mantegnair la construcziun da la punt sche pussaivel uschia, sco ch'ella è, èn vegnidas elavuradas differentas mesiras da reparaziun e da rinforzament en stretga collavuraziun da l'uffizi da construcziun bassa cun la tgira da monuments dal Grischun e realisadas dapi l'avrigl 2014. Uschia è per exempel vegnida allontanada cumplettamain la protecziun cunter corrosiun existenta e remplazzada tras ina protecziun da pliras stresas ch'è pli flexibla. Il medem mument èn vegnidas fatgas isolaziuns. La platta da betun dal vial insuffizienta ha pudì vegnir remplazzada tras ina platta d'atschal ch'è cuvrida d'ina vetta satiglia e che va d'ina vart da la punt a l'autra.

Grazia a las lavurs terminadas ussa sa preschenta questa punt sur il Rain istoricamain impurtanta en nova splendur. Per garantir che la construcziun da travs possia vegnir duvrada uschè ditg sco pussaivel vegn la punt sur il Rain a La Punt/Rehenau dada libra er en l'avegnir mo per in pais maximal da 7 tonnas. Il preventiv dals custs da construcziun da circa 4 milliuns francs ha pudì vegnir observà.

La punt sur il Rain a La Punt/Rehenau


Infurmaziuns:
cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail: Mario.Cavigelli@bvfd.gr.ch  


Gremi: departament da construcziun, traffic e selvicultura
Funtauna: rg departament da construcziun, traffic e selvicultura