La regenza grischuna ha approvà il nov concessiunament da las ovras idraulicas Tavau. Plinavant ha ella mess en vigur la lescha davart la gestiun da documents e l'archivaziun. Ed ella ha deliberà las contribuziuns per la fundaziun per il guaud da muntogna e per la fundaziun SvizraMobila.
Approvà la concessiun per las ovras idraulicas Tavau
La regenza ha approvà las concessiuns dal dretg da las auas per il project per construir da nov l'ovra electrica Flüelabach sco er per engrondir las ovras electricas existentas Frauenkirch e Glaris. Cun quest project vul l'ovra electrica Tavau SA (OET SA) augmentar sia atgna producziun da 12 sin 34 milliuns uras da kilowatt. Ella investescha perquai circa 63 milliuns francs.
La OET SA ha survegnì l'onn 2013 da la vischnanca da Tavau il dretg da duvrar la forza idraulica en la val dal Flüela cun construir ina nova ovra electrica. Il medem mument ha ella survegnì las concessiuns dal dretg da las auas per engrondir las ovras electricas existentas Frauenkirch e Glaris. Las concessiuns per utilisar la forza idraulica, ch'èn ussa vegnidas approvadas da la regenza, vegnan dadas per 80 onns.
Tras il concessiunament da las ovras electricas Frauenkirch e Glaris vegnan meglieradas fermamain las relaziuns da l'aua restanta en la Landwasser ed en l'aual da Sertig. Las quantitads d'aua restanta prescrittas sa drizzan tenor la legislaziun actuala davart la protecziun da las auas e surpassan perquai las pretensiuns che fissan vegnidas realisadas cun ina sanaziun da l'aua restanta. Cun far midadas architectonicas vi da las tschiffadas existentas vegn la OET SA a garantir che l'aua restanta restituida haja la dimensiun prescritta.
Ultra da las novas utilisaziuns resp. da las utilisaziuns extendidas è vegnì fatg in uschenumnà concept per l'utilisaziun da las auas. Il concept cuntegna la gulivaziun tranter territoris cun e senza utilisaziun da la forza idraulica e garantescha per almain 20 onns ch'il traject da l'aual dal Flüela davent da la tschiffada planisada Dörfji vers ensi, che l'aual da Sertig davent da la tschiffada Mühle vers ensi e la finala er che l'aual da Dischma sajan protegids.
Construcziun d'ina nova ovra electrica en la val dal Flüela,
visualisaziun da la tschiffada Dörfji vi da l'aual dal Flüela
Rapport d'experts sco basa per la strategia chantunala da scola auta e da perscrutaziun
Sin la basa da la lescha davart las scolas autas e la perscrutaziun sto la regenza fixar ina strategia chantunala da scola auta e da perscrutaziun. La basa concepziunala per quai furma in rapport d'experts, dal qual la regenza ha prendì enconuschientscha. Il rapport structurescha las activitads da scola auta e da perscrutaziun en il chantun Grischun tenor ils princips da la furmaziun d'accents e da la promoziun da las fermezzas existentas. Sco elements structurals vegnan proponids ils champs da profil "turissem ed economia", "resursas e privels da la natira", "tecnologias-clav", "cultura e diversitad", "life science" sco er "computational science". Cun la resalva ch'ils meds finanzials correspundents sajan disponibels èsi planisà da realisar cun il program da la regenza 2017-2020 pass per pass singulas recumandaziuns dal rapport.
Lescha davart la gestiun da documents e l'archivaziun
La lescha davart la gestiun da documents e l'archivaziun (LGDA) vegn messa en vigur per il 1. da schaner 2016. Ultra da quai ha la regenza relaschà per la medema data l'ordinaziun tar la LGDA. La nova lescha resguarda l'administraziun digitala d'infurmaziuns d'ozendi. Ella fixescha en moda unitara ils princips d'ina gestiun da documents e d'ina archivaziun moderna per tut las autoritads en il chantun.
Contribuziun chantunala per la fundaziun SvizraMobila
Per la fasa da svilup SvizraMobila 2016 – 2019 vegn garantida a la fundaziun SvizraMobila ina contribuziun chantunala da totalmain 256 000 francs. Resalvada resta l'approvaziun dal credit tras il cussegl grond.
SvizraMobila è ina rait naziunala per il traffic betg motorisà e coordinescha ina rait da rutas ch'è signalisada uffizialmain ed en moda unitara. En il turissem da stad dal chantun Grischun giogan il viandar, l'ir cun velo e l'ir cun velo da muntogna ina gronda rolla. Da pudair exercitar questas furmas da mobilitad en ina part da la Svizra ch'è attractiva pervia da sia cuntrada e pervia da sia cultura è in motiv impurtant per giasts da la Svizra e da l'exteriur da passentar lur vacanzas en il Grischun. Spezialmain en il sectur creschent da l'ir cun velo da muntogna survegn la signalisaziun da rutas ina impurtanza adina pli gronda.
Signalisaziun da las rutas en Engiadina
Contribuziuns a la restructuraziun dal center per il guaud da muntogna Mesaglina a Trin
La regenza conceda a la fundaziun per il guaud da muntogna in emprest dad 840 000 francs en il rom da la nova politica regiunala (NPR) per restructurar il center per il guaud da muntogna Mesaglina a Trin. Analogamain a quest emprest federal deliberescha ella ina contribuziun chantunala da 195 025 francs.
La fundaziun per il guaud da muntogna s'engascha per il mantegniment, per la tgira e per la protecziun dal guaud e da la cuntrada cultivada en il territori da muntogna. Cun restructurar il center per il guaud da muntogna pon ils engaschaments da lavur vegnir mantegnids ed extendids. Pervia da l'utilisaziun turistica (spezialmain durant l'enviern) vegn ultra da quai spetgà in augment da las pernottaziuns. Planisads èn 48 letgs en stanzas da plirs letgs.
Midada dal center per il guaud da muntogna Mesaglina, model
Per la fin da l'onn
Durant l'onn che va a fin ha la regenza grischuna salvà 41 sesidas. A chaschun da quellas ha ella prendì 1141 conclus (onn precedent: 1244).
Il presidi da la regenza va il 1. da schaner 2016 a Christian Rathgeb, schef dal departament da giustia, segirezza e sanadad dal chantun Grischun. Vicepresidenta daventa Barbara Janom Steiner, scheffa dal departament da finanzas e vischnancas.
La regenza giavischa a tut las conburgaisas ed a tut ils conburgais tut il bun per la fin da l'onn e buna sanadad per l'onn nov.
Gremi: regenza
Funtauna: rg chanzlia chantunala dal Grischun