En sia ultima sesida ha la regenza grischuna approvà in contract tranter la confederaziun ed ils chantuns davart il barat gratuit da geodatas da basa. Ultra da quai ha ella approvà la cunvegna tranter la confederaziun ed ils chantuns Uri, Valais, Tessin e Grischun davart il program da realisaziun San Gottardo 2016–2019 en il rom da la nova politica regiunala.

Barat gratuit da geodatas da basa tranter la confederaziun ed il chantun
La regenza grischuna ha approvà il contract tranter la confederaziun ed ils chantuns davart il barat gratuit da geodatas da basa tranter las autoritads. Il contract furma la basa per utilisar meglier las geodatas da basa.
Oz vegnan las geodatas da basa messas a disposiziun en ils chantuns e tar la confederaziun tenor las ordinaziuns da taxas respectivas. Cun quest contract vegni desistì da metter a quint vicendaivlamain il barat da datas tranter las autoritads u d'incassar ina pauschala per quai. Il barat gratuit promova l'utilisaziun da geodatas da basa actualas ed evitescha custs administrativs. El è d'avantatg en spezial per las autoritads e per las instituziuns pertutgadas en il Grischun, perquai che en il chantun vala il princip da l'exemziun da taxas per utilisar geodatas da basa ch'èn accessiblas publicamain. Da quest contract resulta perquai in respargn da custs per il chantun Grischun.
Il contract survegn vigur legala ed ha in effect per il chantun Grischun però pir, cur che – ultra da la confederaziun – almain otg chantuns al ratifitgeschan.

Nova politica regiunala: approvà il program da realisaziun San Gottardo 2016–2019
La regenza ha approvà la cunvegna tranter la confederaziun ed ils chantuns Uri, Valais, Tessin e Grischun concernent il program da realisaziun San Gottardo 2016–2019. En il rom da la nova politica regiunala (NPG) promovan la confederaziun ed ils chantuns il svilup economic en il territori rural. Cun differentas mesiras duai vegnir rinforzada la cumpetitivitad da singulas regiuns e duai vegnir augmentada la valurisaziun da talas. Ensemen cun ils chantuns Tessin, Uri e Vallais ha il chantun Grischun elavurà in program da realisaziun per il territori dal Gottard. En il center da quest program stat il turissem.
Per il chantun Grischun è la collavuraziun interchantunala en il territori dal Gottard d'impurtanza strategica. Grazia a las activitads da la NPR da fin ussa, en spezial pervia da la stretga collavuraziun dad Andermatt-Sedrun-Mustér (tranter auter cun la colliaziun dal territori da skis) sa manifesteschan impuls economics impurtants per la regiun Surselva.
La confederaziun prevesa da sa participar al program da realisaziun San Gottardo 2016–2019 cun in credit tenor NPR da totalmain 38 milliuns francs. Las contribuziuns dals chantuns importan tut en tut 14,2 milliuns francs, la part dal Grischun sa munta a circa 4,1 milliuns francs.

Ulteriuras infurmaziuns: program San Gottardo


Gremi: regenza
Funtauna: rg chanzlia chantunala dal Grischun