Il chantun Grischun augmenta il dumber d'asils da selvaschina. Quai ha la regenza grischuna concludì a chaschun da sia ultima sesida. En ina brev a la confederaziun è la regenza plinavant s'exprimida davart l'ulteriur proceder areguard il center naziunal da sports da naiv a Lai. Ultra da quai ha ella dà l'incarica da pajar las contribuziuns per la staziun d'erizuns da la pensiun d'animals a Cuira.

La regenza insista sin il center naziunal da sports da naiv a Lai
En ina brev a la confederaziun è la regenza s'exprimida davart l'ulteriur proceder suenter ils resultats da la consultaziun tar la vista cumplessiva dal sport. La fin da matg 2016 ha la confederaziun infurmà che la planisaziun per in center naziunal da sports da naiv a Lai (CNSN Lai) vegnia sistida fin l'onn 2023. La regenza ha prendì enconuschientscha dal fatg ch'igl è vegnì demussà in ulteriur sustegn per Lai, ma ha exprimì a medem temp ses displaschair pervia da la sistida. Il project è fitg impurtant per la promoziun dal sport da naiv e dal sport d'uffants e da giuvenils.
La regenza è anc adina cunter in priorisaziun da las investiziuns tenor lieus. Las mesiras duain succeder tenor singuls projects d'immobiglias, e quai independentamain dal lieu ed independentamain da la dumonda, sch'ellas èn d'attribuir al sport da massa u al sport da prestaziun. Sch'ils engrondiments (Magglingen e Tenero) sco er il nov CNSN Lai vegnan priorisads consequentamain sin basa da l'impurtanza da las singulas disciplinas da sport, sa lascha cuntanscher in svilup cunvegnent er resguardond la libertad d'agir limitada areguard las finanzas federalas. La realisaziun dal CNSN Lai è da preferir cleramain ad in ulteriur engrondiment da Magglingen e da Tenero.

Il Grischun survegn dapli asils da selvaschina
Il chantun Grischun augmenta il dumber d'asils da selvaschina. Quai ha concludì la regenza grischuna, approvond las disposiziuns correspundentas. Ils asils da selvaschina èn instruments impurtants per la planisaziun da la chatscha. Els gidan ad auzar localmain effectivs da selvaschina debels, a meglierar la structura natirala dals effectivs sco er a proteger spezias da selvaschina periclitadas cunter ils disturbis da la chatscha. Ils ultims dus onns èn vegnidas fatgas durant la chatscha auta differentas emprovas per augmentar il dumber d'animals sajettads per lung dals cunfins dals asils da selvaschina cun agid da prescripziuns da chatscha adattadas. Las experientschas tuttavia positivas èn lura er vegnidas resguardadas en la revisiun actuala dals asils da selvaschina.
En il rom da la nova regulaziun concludida è il dumber d'asils da selvaschina generals vegnì augmentà da 215 a 230, il dumber d'asils da chatscha auta da 19 a 22 ed il dumber d'asils da chatscha bassa da 44 a 53. Tar las autras categorias d'asils èn vegnids determinads sco fin ussa 1 asil da chavriels e 22 asils da muntanellas. Il dumber d'asils da lieurs è vegnì reducì per 8 a 46. Il dumber d'asils d'utschleglia è vegnì augmentà a 21 ed il dumber d'asils d'utschleglia da l'aua a 46. Tut en tut vegn il dumber d'asils da selvaschina chantunals augmentà d'actualmain 411 a 441. La surfatscha totala sa reducescha dentant da 755 a 739 kilometers quadrat. Ensemen cun il parc naziunal svizzer e cun ils sis asils da selvaschina federals resulta en il chantun ina surfatscha totala d'asils da selvaschina da 1114 kilometers quadrat.
Circa mintga tschintg onns fixescha la regenza da nov ils asils da selvaschina chantunals. Per determinar ils territoris ston vegnir observads differents princips che han da valair en general. Per cuntanscher ina buna repartiziun da la selvaschina na ston betg vegnir zavrads gronds asils da selvaschina, mabain numerus asils pitschens. Asils da selvaschina memia gronds chaschunan accumulaziuns da selvaschina nungiavischadas.

Pajament da las contribuziuns per la staziun d'erizuns da la pensiun d'animals a Cuira
La regenza accepta la dumonda da l'associaziun "Tierheim Chur" da pajar las contribuziuns per construir e per manar ina staziun d'erizuns en la pensiun d'animals a Cuira.
En sia resposta dals 23 da zercladur 2015 ad ina incumbensa parlamentara ha la regenza empermess ina contribuziun iniziala unica da maximalmain 100 000 francs per l'infrastructura d'ina staziun d'erizuns. Questa contribuziun iniziala dal chantun vegn ussa pajada a quint dal fond da la lottaria naziunala. Plinavant vegnan pajads 5000 francs per onn als custs da gestiun. La staziun d'erizuns è vegnida averta l'avrigl 2016.


Gremi: regenza
Funtauna: rg chanzlia chantunala dal Grischun