Il cussegl d'administraziun da la SwissDRG SA ha elegì il president da la regenza Christian Rathgeb sco ses president. Il president da la regenza Rathgeb è dapi ils 31 d'october 2014 commember dal cussegl d'administraziun da la SwissDRG SA.

Tenor la lescha federala davart l'assicuranza da malsauns (LAMal) è la SwissDRG SA cun sedia a Berna cumpetenta per elavurar, per sviluppar vinavant e per adattar il sistem da pauschalas pro cas da SwissDRG. Dapi il 1. da schaner 2012 vegnan indemnisads ils tractaments staziunars en ils ospitals tenor prestaziun tras pauschalas pro cas tut tenor la grevezza dal cas. Mintga dimora a l'ospital vegn attribuida a maun da tscherts criteris sco diagnosa principala, diagnosas secundaras, tractaments ed ulteriurs facturs, ad ina gruppa da cas e vegn indemnisada pauschalmain. Tenor la finamira dal cussegl d'administraziun duain – a partir da l'onn 2018 – vegnir indemnisadas cun pauschalas che sa drizzan tenor la prestaziun er las dimoras staziunaras en las clinicas da reabilitaziun ed en las clinicas psichiatricas.

Dal cussegl d'administraziun da la SwissDRG SA fan part represchentantas e represchentants da la conferenza svizra da las directuras e dals directurs chantunals da sanadad, da H+ Ils ospitals da la Svizra, da santésuisse Las assicuranzas svizras da malsauns, da la cumissiun per tariffas medicinalas LAA, da la AMil/AI e da la federaziun dals medis svizzers (FMH).

Il president da la regenza Christian Rathgeb remplazza en il presidi da la SwissDRG SA il schef da la direcziun da sanadad dal chantun Turitg, cusseglier guvernativ Thomas Heiniger. Cusseglier guvernativ Thomas Heiniger aveva surpiglià l'onn 2012 il presidi da cusseglier guvernativ Carlo Conti (BS).


Infurmaziuns:
president da la regenza Christian Rathgeb, schef dal departament da giustia, segirezza e sanadad, tel: 081 257 25 01, e-mail: Christian.Rathgeb@djsg.gr.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad