Cun la finamira da rinforzar il Grischun sco lieu da scolaziun e da promover l'export da furmaziun ha la regenza garantì al Centro Tecnologico del Legno (CTL) a Puschlav ina contribuziun da totalmain 500 000 francs per installar e per sviluppar vinavant il center da cumpetenza per laina.

La finamira dal CTL che sa chatta en il territori da cunfin cun l'Italia è quella da rinforzar il Grischun sco lieu da scolaziun e da promover l'export da furmaziun. Sur il transfer da savida e da tecnologia duain vegnir promovidas innovaziuns ed augmentada la cumpetitivitad en la branscha da lain e da mobiglia. Cun ina collavuraziun transcunfinala persistenta duai vegnir tratg a niz il potenzial da valurisaziun da la resursa "lain" e sustegnì il svilup economic da la "Regione Valposchiavo".

Er quest sectur d'export è pertutgà da las consequenzas da la fermezza dal franc. Actualmain s'interessan bler main students che planisà per las purschidas da scolaziun. Il CTL basegna resursas supplementaras da temp, da persunal e finanzialas per pudair realisar las mesiras necessarias per elavurar il martgà e per metter il center da cumpetenza per laina sin ina basa purtanta.

Considerond la situaziun economica e l'impurtanza da quest project da svilup per la "Regione Valposchiavo" è la regenza pronta da sustegnair – cun resalva d'ina finanziaziun totala reglada – la cuntinuaziun da las lavurs d'installaziun cun ina contribuziun NPR supplementara da 500 000 francs, finanziada mintgamai per la mesadad da la confederaziun e dal chantun.

Il december 2013 eran vegnids garantids al CTL – cun resalva d'ina finanziaziun totala reglada – per installar il center da cumpetenza per laina a Puschlav in emprest or dals meds finanzials da la nova politica regiunala da la confederaziun (NPR) dad 1,5 milliuns francs, ina contribuziun chantunala obligatorica tar l'emprest NPR da 434 070 francs sco er ina contribuziun chantunala per il svilup dal lieu da 150 000 francs.


Infurmaziuns:
cusseglier guvernativ dr. Jon Domenic Parolini, schef dal departament d'economia publica e fatgs socials dal Grischun, tel. 081 257 23 01, e-mail: Jondomenic.Parolini@dvs.gr.ch


Gremi: regenza
Funtauna: rg chanzlia chantunala dal Grischun