En sia ultima sesida ha la regenza approvà ina nov incarica da prestaziun cun la claustra da las dominicanas a Cazas per la collocaziun e l'assistenza da requirentas e requirents d'asil sco er da fugitivas e fugitivs minorens betg accumpagnads. Ultra da quai ha ella approvà la revisiun parziala da l'ordinaziun davart la scola media commerziala.

Posiziun tar il credit d'impegn per indemnisar prestaziuns en il traffic da persunas regiunal
La regenza grischuna ha prendì posiziun tar l'introducziun d'in credit d'impegn per indemnisar prestaziuns en il traffic da persunas regiunal per ils onns 2018 fin 2021. La conferenza dals directurs chantunals dal traffic public (CTP), da la quala fa part er il chantun Grischun, ha redigì ina resposta da consultaziun cuminaivla en chaussa. La regenza dal chantun Grischun sustegna dal tuttafatg questa posiziun da la CTP. Cumplementarmain pretenda ella però ch'il credit d'impegn na vegnia betg mo deliberà per la perioda d'urari 2018 – 2019, mabain er per la segunda perioda d'urari 2020 – 2021. Uschiglio va a perder la segirezza da planisaziun supplementara giavischada per la segunda perioda d'urari, damai ch'i sto vegnir fatg quint cun ulteriuras mesiras da spargn da la confederaziun.
Ultra da quai vul la confederaziun approvar ils meds da manaschi per l'emprima perioda d'urari 2018 – 2019 mo, sch'ils chantuns garanteschan da surpigliar sulets la finanziaziun dals custs consecutivs. La regenza grischuna è da l'avis ch'i vegnia lura probablamain a valair il medem er per periodas d'urari posteriuras. Tras quai vegnissan transferids custs en moda betg pli tolerabla sin ils chantuns. I na po betg esser che la confederaziun impunda ses meds finanzials en dependenza da la situaziun finanziala respectiva ed oblighescha a medem temp ils chantuns ordavant da cuvrir la largia finanziala, per la quala ella è conresponsabla.

Incarica da prestaziun per la collocaziun e l'assistenza da requirentas e requirents d'asil sco er da fugitivas e fugitivs minorens betg accumpagnads
La regenza ha approvà ina nov incarica da prestaziun tranter il chantun Grischun e la claustra da las dominicanas a Cazas per la collocaziun e l'assistenza da requirentas e requirents d'asil sco er da fugitivas e fugitivs minorens betg accumpagnads. L'incarica da prestaziun vala a partir dal 1. da fanadur 2016. En la claustra da las dominicanas a Cazas vegnan collocadas ed assistidas dunnas giuvnas betg accumpagnadas (cun il status requirenta d'asil, persuna admessa provisoricamain e fugitiva) a partir da 16 onns. Ultra da metter a disposiziun ina purschida d'abitar e d'alimentaziun sto la claustra furnir anc autras prestaziuns. Latiers tutgan tranter auter l'intermediaziun da structuras dal di (per exempel scola, furmaziun professiunala), sustegn per concepir il temp liber sco er agid per s'orientar en la cultura svizra (identitad, demananzas). Las prestaziuns vegnan furnidas en l'internat da la scola S. Catarina a Cazas. Là vegnan assistidas e collocadas tranter tschintg e diesch giuvnas. Tut en tut èsi da far quint cun custs annuals da fin a 630 000 francs. Durant la fasa transitorica, fin ch'igl è avant maun ina lescha cun ina regulaziun definitiva davart la repartiziun dals custs sin tut las vischnancas grischunas, vegnan quests custs cuvrids sur ina part da la pauschala globala existenta da la confederaziun per fugitivs senza activitad da gudogn.

Revisiun parziala da l'ordinaziun davart la scola media commerziala
La regenza grischuna ha approvà la revisiun parziala da l'ordinaziun davart la scola media commerziala. Ils onns passads èn las disposiziuns vertentas dal dretg federal davart las scolas medias commerzialas vegnidas midadas pliras giadas. Pervia da quai sto l'ordinaziun chantunala davart la scola media commerziala (OSMC) dals 8 da november 2011 vegnir suttamessa ad ina revisiun parziala. Il medem mument ston ils uraris ed ils plans d'instrucziun da las scolas medias commerzialas vegnir adattads a las disposiziuns vertentas surordinadas.
En la scola chantunala grischuna sco er en las scolas medias privatas vegn la scola media commerziala da princip manada cun maturitad professiunala integrada. La scola media commerziala da la fundaziun per il gimnasi da sport da Tavau porscha dapi l'onn da scola 2011/12 mo pli il diplom da commerzianta resp. commerziant cun attestat federal da qualificaziun (AFQ) cun ina durada da la scolaziun prolungada per 1 onn. La revisiun parziala qua avant maun da la OSMC regla il diplom da commerzianta resp. commerziant AFQ cun maturitad professiunala.

Contribuziun chantunala per la renovaziun dal center da sport San Bernardin
La regenza deliberescha in sustegn finanzial per la renovaziun dal center da sport San Bernardin, e quai en il rom da la nova politica regiunala da la confederaziun (NPR). A la vischnanca da Mesauc vegn concedì in emprest da daners tenor NPR da la confederaziun da 400 000 francs. Ultra da l'emprest da daners tenor NPR conceda la regenza sia contribuziun obligatorica da 67 336 francs.
Il project cuntegna la construcziun d'in edifizi da manaschi cun gardarobas, cun in local da material e cun ina bar sco er la sanaziun da trais plazzas da tennis. L'edifizi da manaschi serva tant als giasts la stad (tennis, minigolf) sco er l'enviern (plazza da glatsch artifizial).

Acquist dal sistem d'infurmaziun agrara Agricola sviluppà vinavant
Per sviluppar vinavant e per manar il sistem d'infurmaziun agrara Agricola conceda la regenza in credit da tut en tut 1 057 260 francs. Resalvada resta la concessiun dals meds finanzials necessaris tras il cussegl grond.
La software è l'instrument da lavur per calcular e per far ils pajaments directs. Per calcular ils pajaments directs è actualmain necessaria ina procedura d'elavurar e da maschadar las datas GIS e d'importar quellas en la banca da datas. Questa procedura dovra bler temp. Cun il nov sistem croda davent il barat da datas stentus, cunquai che las datas GIS vegnan elavuradas automaticamain en Agricola. Tut en tut vegnan administrads passa 2700 manaschis cun il sistem d'infurmaziun agrara Agricola.

Gremi: regenza
Funtauna: rg chanzlia chantunala dal Grischun