Experts independents dattan in bun attestat a la banca chantunala grischuna (BCG). Suenter l'onn 2010 ha la Ernst & Young SA (EY) fatg per la segunda giada per incumbensa da la regenza in rapport da ristga e da responsabladad concernent la garanzia chantunala dal chantun per la BCG. La societad d'audit è vegnida a la conclusiun "ch'in cas da responsabladad dastga vegnir valità sco fitg improbabel sut las supposiziuns resguardadas". La regenza e la direcziun da la BCG èn fitg cuntentas cun il giudicament dals experts independents. La BCG ha ina substanza ordvart ferma ed è ina banca fitg segira.

La regenza ha incumbensà EY da giuditgar danovamain la situaziun da ristga e da responsabladad dal chantun Grischun areguard la garanzia chantunala per la BCG, suenter ch'in tal giudicament era vegnì fatg per l'emprima giada l'onn 2010. La creschientscha da la BCG cun ina summa da bilantscha dad entant passa 20 milliardas francs, ils svilups sin ils martgads da tschains e d'immobiglias sco er diversas novas prescripziuns regulatoricas èn tranter auter stads ils arguments per laschar giuditgar danovamain la ristga areguard la garanzia chantunala.

La BCG ha ina substanza ordvart ferma. Per la fin da l'onn 2015 aveva la BCG a disposiziun agens meds da 2,3 milliardas francs. La substanza da ristga calculada importava schizunt 2,6 milliardas francs. En la cumparegliaziun da la branscha e spezialmain er tranter las bancas chantunalas ha la BCG in fitg aut grad da cuvrida dals agens meds. La quota dal chapital essenzial (CET-1-ratio) da 18,7 pertschient è cleramain sur la valur minimala definida dal cussegl da banca (14,5 %) e sur la valur fixada da l'autoritad federala per la surveglianza dals martgads da finanzas (FINMA) (12,7 %).

Il rapport da ristga e da responsabladad 2016 cuntegna in'analisa da la situaziun da ristga da la BCG areguard in'eventuala responsabladad dal chantun. Dapi il rapport 2010 èn las activas, ch'èn graduadas tenor las ristgas, creschidas procentualmain bler damain che la summa da bilantscha. "Da quai pon ins deducir che las ristgas da la banca n'èn betg creschidas proporziunalmain tar la summa da bilantscha", constateschan ils experts.

La dotaziun da chapital fitg solida da la BCG dat gronda segirezza a la clientella d'ina vart ed al chantun sco proprietari e garant da l'autra vart. La regenza ha prendì enconuschientscha cun satisfacziun dal rapport da ristga e da responsabladad 2016 ed ha approvà il rapport da gestiun 2015 da la BCG.


Infurmaziuns:
- Cussegliera guvernativa Barbara Janom Steiner, Scheffa dal departament da finanzas e vischnancas, tel. 081 257 32 01, e-mail: Barbara.Janom@dfg.gr.ch
- Peter Fanconi, President dal cussegl da banca da la banca chantunala grischuna, tel. 081 256 83 11 (Servetsch da medias), e-mail: peter.fanconi@gkb.ch


Gremi: departament da finanzas e vischnancas
Funtauna: rg departament da finanzas e vischnancas