La regenza fa adattaziuns da duas midadas d'ordinaziuns federalas previsas. Plinavant permetta ella da manar ina classa primara privata a Tavau ed approvescha l'amplificaziun dals indrizs d'ennavar a Churwalden.

La regenza cusseglia d'adattar dus projects da revisiun
La regenza grischuna prenda posiziun tar las revisiuns previsas da l'ordinaziun d'energia (OEn) e da l'ordinaziun davart il provediment d'electricitad (OPrEl). Centralas èn qua adattaziuns en connex cun l'indemnisaziun per cuvrir ils custs da la furniziun d'electricitad (ICF) e da l'indemnisaziun unica. Omadus èn instruments da la confederaziun, che vegnan duvrads per promover la producziun d'electricitad or d'energias regenerablas. La regenza è s'exprimida pliras giadas gia en il passà decididamain da vulair introducir proximamain in nov model da promoziun per las energias regenerablas empè d'in model da la ICF. Correspundentamain propona ella da reponderar anc ina giada e d'adattar las midadas vi dal model da promoziun existent proponidas da l'uffizi federal d'energia.
La regenza crititgescha cunzunt la proposta da reducir las tariffas e d'applitgar quai gia a partir da l'onn 2017 per tut ils indrizs. Da questa midada fissan pertutgads numerus projects ch'èn vegnids sviluppads sur onns e ch'èn avanzads en vista a las indemnisaziuns ch'èn actualmain valaivlas. Perquai stuess in'eventuala reducziun da las tariffas ICF vegnir annunziada cun in temp precursur d'almain 2 onns.

Permissiun da manar ina classa primara privata
La Scola media svizra alpina Tavau (SAMD) survegn la permissiun da manar ina 5./6. classa primara privata. L'urari da questa purschida correspunda a quel d'ina scola publica. A la SAMD datti gia oz la purschida che scolaras e scolars vegnan promovids cun cleras finamiras per l'examen d'admissiun al gimnasi inferiur en ina 6. classa primara privata. Sin fundament da pli e pli dumondas prevesa la SAMD d'extender questa purschida per il proxim onn da scola. Per l'instrucziun privata cun passa 5 scolaras e scolars dovri dentant ina permissiun che vegn dada ussa da la regenza grischuna.

Glisch verda per projects da correcziun da curs d'aua e da protecziun cunter crudada da crappa
La regenza approvescha in project da dustanza a la Landquart. Cun quel vuless la vischnanca da Luzein meglierar la protecziun cunter aua gronda. Il basegn è sa mussà a chaschun da las malauras 2005. Quella giada èn vegnidas inundadas tranter auter la serenera (serenera Partenz central) sco er diversas vias e sendas. Als custs budgetads dad 825 000 francs vegn garantida ina contribuziun chantunala da maximalmain 165 000 francs.
In ulteriur project per la correcziun da curs d'aua approvescha la regenza en la vischnanca da San Murezzan. Er là pretenda il privel d'aua gronda investiziuns. Durant ina inspecziun periodica ha la vischnanca constatà ch'il chanal da l'Ovel da la resgia ha donns architectonics gravants. Per ch'il mir dal chanal na rumpia betg en cas d'aua gronda, èn necessarias mesiras architectonicas da l'import da 738 000 francs. Il chantun Grischun sa participescha maximalmain cun 184 500 francs al project.
Approvà vegn er in project cunter crudada da crappa da la Viafier retica. Per lung dal trassé da la viafier tranter Claustra Plaz e Cavadürli duai vegnir garantida la protecziun da la viafier. Ils ultims onns hai dà en quest territori pliras giadas crudadas da crappa e da grippa. Als custs dal project dad 1 370 000 francs garantescha la regenza ina contribuziun chantunala da maximalmain 1 027 500 francs.

Approvaziun da l'amplificaziun dals indrizs d'ennavar a Churwalden
La regenza approvescha il plan general d'avertura da la vischnanca da Churwalden. Quai permetta da realisar in nov indriz d'ennavar en il territori da skis Pradaschier. Là èsi sa mussà ils envierns passads che la segirezza da naiv durant il principi e la fin da l'enviern n'ha betg pudì vegnir garantida. Per augmentar questa segirezza da naiv duai ussa vegnir ennavada tecnicamain la part sut dal territori da skis, da la staziun da mez fin en il vitg da Churwalden, sin ina surfatscha da 12,5 ha. Tenor il rapport davart la cumpatibilitad ecologica (RCE) correspunda quest project a las disposiziuns vertentas da la protecziun da l'ambient.

Approvà ina nova zona dal center en la vischnanca da Lumnezia
La regenza approvescha la creaziun d'ina zona dal center a Vella. Tras quai resulta la basa planisatorica per construir in edifizi cun negozis e cun ina pratica da medi en la vischinanza da la chasa communala. La nova zona dal center correspunda al concept dal territori per il Grischun che la regenza ha deliberà. Quest concept promova Vella sco center da la vischnanca fusiunada Lumnezia. Il territori che vegn attribuì da nov a la zona dal center cumpiglia circa 2281 meters quadrat.

Posiziun davart petiziuns da la sessiun dals giuvenils
La regenza grischuna è s'occupada da la sessiun dals giuvenils dal Grischun 2016. L'avrigl èn s'occupads circa 90 giuvenils en la vegliadetgna tranter 16 e 25 onns durant 2 dis activamain da l'avegnir dal chantun. Las totalmain 9 petiziuns relaschadas pertutgan las tematicas ambient, segirezza, participaziun da giuvenils e vita nocturna. La regenza prenda posiziun areguard il cuntegn da tut las propostas dals giuvenils.


Gremi: regenza
Funtauna: rg chanzlia chantunala dal Grischun