Er l'onn 2016 èn vegnidas inoltradas bleras dumondas d'asil en Svizra, e tenor l'experientscha stoi vegnir quintà la fin da la stad e l'atun cun cifras plitgunsch creschentas. Il chantun prenda perquai ulteriuras mesiras per garantir la collocaziun e l'assistenza da requirentas e requirents d'asil e prenda en locaziun ina immobiglia en la vischnanca da Spleia.

Al chantun Grischun ha la confederaziun attribuì l'onn 2016 tut en tut 405 requirentas e requirents d'asil fin la fin da fanadur, quai ch'è in dumber sumegliant sco l'onn passà, cur ch'i èn vegnidas attribuidas al chantun 442 persunas entaifer la medema perioda. Il contract da locaziun per l'immobiglia Schiabach a Tavau Plaz finescha definitivamain la primavaira 2017, suenter ch'il contract ha pudì vegnir prolungà pliras giadas a curta vista. Dapi il fanadur 2016 vegn questa immobiglia anc duvrada sco alloschi da reserva. Perquai ch'ils centers da transit a Cazas, Laax, Litzirüti, Mustér, Schluein, Tavau, Trimmis e Val Müstair èn occupads fermamain, vegn prendì en locaziun a partir dal 1. da november 2016 a vista mesauna l'hotel Pratigiana a Spleia per pudair garantir la capacitad da collocaziun.

Cun quest nov alloschi sin il territori da la vischnanca da Spleia duain vegnir dumagnadas las midadas extraordinarias dal dumber da requirentas e requirents d'asil attribuids al chantun, ed i duai vegnir evità tant sco pussaivel da stuair metter a disposiziun collocaziuns provisoricas sutterranas. Il center da transit vegn prendì en funcziun pir, cur che tut ils auters alloschis collectivs en il chantun èn occupads cun requirentas e requirents d'asil attribuids da nov al Grischun. A Spleia duain vegnir collocadas famiglias cun uffants che n'èn betg obligads d'ir a scola, ma er dunnas sulettas ed umens sulets.


Infurmaziuns:
- president da la regenza Christian Rathgeb, schef dal departament da giustia, segirezza e sanadad, tel. 081 257 25 01
- Marcel Suter, manader da l'uffizi da migraziun e da dretg civil, tel. 081 257 25 21


Gremi: regenza
Funtauna: rg chanzlia chantunala dal Grischun