Ils 31-12-2015 vivevan permanentamain 196 610 abitantas ed abitants en il chantun Grischun, 724 dapli che l'onn precedent. Sco durant ils onns precedents è l'augment d'attribuir quasi exclusivamain a la creschientscha da la populaziun estra.

Il svilup dals ultims onns cuntinuescha
Il Grischun ha obtegnì er l'onn 2015 dapli populaziun permanenta, la rata da creschientscha da 0,4 pertschient è dentant in pau pli bassa che quella dals onns precedents. En cumparegliaziun cun la Svizra (1,1 pertschient) è la creschientscha en il Grischun stada puspè modesta l'onn 2015, unicamain il chantun Uri ha gì in svilup main dinamic. Las ratas da creschientscha las pli autas han gì l'onn 2015 – sco ils ultims onns – ils chantuns Zug, Genevra e Vad.

Creschientscha en il Grischun cunzunt per lung da las axas centralas
Las regiuns Plaun, Landquart e Moesa han contribuì l'onn 2015 procentualmain il pli ferm a l'augment da la populaziun en il Grischun. Cuntrari a quai abitavan la fin da l'onn 2015 in pau pli paucas persunas en las regiuns Malögia, Bernina sco er Partenz/Tavau ch'in onn avant.

Populaziun permanenta per ils 31-12-2015 tenor regiuns sco er midadas procentualas l'onn 2015
La populaziun da la citad da Cuira è s'augmentada l'onn passà per 0,3 pertschient, la citad quinta da nov 34 652 abitantas ed abitants permanents. Da las duas dunsainas da las vischnancas las pli grondas han survegnì procentualmain las pli bleras abitantas ed ils pli blers abitants Trimmis, Panaduz e Favugn, entant che San Murezzan, Arosa e Claustra-Serneus han subì las pli grondas perditas d'abitantas e d'abitants en questa gruppa.

Divergenzas tar ils svilups a lunga vista
La structura da la populaziun ed il svilup a pli lunga vista èn fitg differents tranter las regiuns grischunas. Motors da creschientscha èn stads ils ultims onns cunzunt las regiuns Plaun e Landquart cun augments da procentualas da duas cifras. Per regla mussan regiuns cun ina dinamica pli pitschna u schizunt negativa er structuras da vegliadetgna demograficamain pli disfavuraivlas cun ina quota relativamain auta da persunas pli attempadas.

Cifras distinctivas per la vegliadetgna 2015 e midada da la populaziun permanenta tenor regiuns, 2005–2015

Funtauna: uffizi federal da statistica (STATPOP)

Quozient da giuventetgna: dumber da persunas da 0–19 onns sin 100 persunas da 20–64 onns
Quozient da vegliadetgna: dumber da persunas da 65 onns e dapli sin 100 persunas da 20–64 onns

Augment mo tar la populaziun estra
Cuntrari a la populaziun svizra è la populaziun estra s'augmentada er l'onn 2015 relativamain ferm per 1,5 pertschient, da nov quinta il Grischun 35 921 abitantas ed abitants esters permanents. La gruppa cleramain la pli gronda èn anc adina ils burgais portugais (9542), suandadas dals abitants tudestgs (7611) e da quels talians (6320). Tut en tut han persunas da 130 differentas naziuns lur domicil en il Grischun.

In zic damain naschientschas e dapli mortoris
L'onn passà èn naschids 1748 uffants en il Grischun, 55 damain che l'onn precedent. Il dumber da las naschientschas ha surpassà pia mo levamain il dumber dals mortoris ch'è s'augmentà a medem temp sin 1734. Stgars 80 pertschient da las mammas eran maridadas il mument da la naschientscha.

Plinavant èn vegnidas registradas l'onn passà 928 maridaglias e 6 partenadis registrads, 360 lètgs èn vegnidas divorziadas en il Grischun. Questas valurs èn stadas sumegliantas a la dimensiun sco en ils onns precedents.

Ils resultats detagliads da las statisticas da la populaziun da tut las vischnancas e da tut las regiuns sco er ulteriuras infurmaziuns stattan a disposiziun sin la pagina d'internet da l'uffizi per economia e turissem, vesair (Statistik und Register).


Infurmaziuns:
Patrick Casanova, manader da la partiziun "statistica e registers", tel. 081 257 23 74, e-mail Patrick.Casanova@awt.gr.ch


Gremi: uffizi per economia e turissem dal Grischun
Funtauna: rg uffizi per economia e turissem dal Grischun