La regenza ha prendì posiziun tar duas consultaziuns da la confederaziun, plinavant ha ella prendì enconuschientscha da la dumonda per engrondir il reservat da biosfera da l'UNESCO Engiadina Val Müstair e concedì ina contribuziun chantunala per construir ina sutgera a Claustra.

La regenza ha prendì posiziun tar duas consultaziuns da la confederaziun
Per l'ina ha la regenza prendì posiziun tar il pachet d'ordinaziuns "ambient" da la confederaziun, che vegn datà per la primavaira 2017. I sa tracta da l'adattaziun tecnica d'ordinaziuns dal dretg d'ambient; particularmain da l'ordinaziun davart las substanzas chemicas, da l'ordinaziun davart las deponias veglias, da l'ordinaziun tar la lescha federala davart la pestga sco er da l'ordinaziun davart la protecziun da las auas.
Per l'autra è la regenza sa participada a la consultaziun tar il quart rapport da la Svizra davart la realisaziun da la convenziun da basa dal cussegl da l'Europa per proteger las minoritads naziunalas. Il rapport da la confederaziun vegn cumplettà cun infurmaziuns davart ils ultims svilups en il chantun Grischun.

Dumonda per engrondir il reservat da biosfera da l'UNESCO Engiadina Val Müstair
La regenza ha prendì enconuschientscha dals documents da dumonda per engrondir il reservat da biosfera da l'UNESCO Engiadina Val Müstair e supplitgescha l'uffizi federal d'ambient da transmetter ils documents a l'UNESCO.
Il Parc naziunal svizzer è vegnì declerà da l'UNESCO l'onn 1979 sco emprim reservat da biosfera da l'UNESCO da la Svizra. L'onn 1995 ha l'UNESCO midà las pretensiuns per renconuscher tals reservats. Da nov ha ella pretendì che la zona centrala stoppia esser circumdada cumplettamain d'ina zona da plimatsch. Perquai ha il Parc naziunal svizzer inoltrà – ensemen cun la vischnanca da Val Müstair – ina dumonda d'engrondir il reservat da biosfera da l'UNESCO. Il reservat engrondì consista per l'ina dal Parc naziunal svizzer cun la zona centrala fermamain protegida e per l'autra da la Val Müstair che furma la zona da tgira e da svilup. La surfatscha dal reservat da biosfera è pia pli che sa dublegiada. L'UNESCO ha approvà quest engrondiment l'onn 2010, schebain che las prescripziuns n'eran betg anc ademplidas dal tuttafatg. Perquai ha l'UNESCO fatg la cundiziun ch'i vegnia etablì in plan da manaschament cumplessiv. Quest plan è ussa avant maun ed è ina part dals documents da dumonda cumplets per l'engrondiment dal reservat da biosfera da l'UNESCO Engiadina Val Müstair.

Contribuziun chantunala per construir ina sutgera a Claustra
La regenza ha deliberà in sustegn finanzial per la construcziun da la sutgera Schaffürggli incl. per in indriz d'ennavar, e quai en il rom da la nova politica regiunala da la confederaziun (NPR).
A la las Telefericas Claustra-Madrisa SA vegn concedì in emprest da daners tenor NPR da la confederaziun da 2 milliuns francs. Ultra da l'emprest da daners tenor NPR ha la regenza concedì sia contribuziun obligatorica da 464 345 francs. Il project cumpiglia la construcziun d'ina sutgera da sis Madrisa-Schaffürggli sco er in indriz d'ennavar. Questas investiziuns duain rinforzar la purschida si Madrisa e sustegnair la posiziun da Claustra sco destinaziun da famiglias e da trais generaziuns.
© Kloster-Madrisa Bergbahnen AG


Gremi: regenza
Funtauna: rg chanzlia chantunala dal Grischun