Dapi onns maina l'uffizi da migraziun e da dretg civil en differents lieus en il chantun alloschis collectivs per persunas dal sectur d'asil. A la gestiunaria statti zunt a cor da mussar a la populaziun indigena, co ch'in tal manaschi funcziunescha. Perquai vegnan organisads proximamain dis da publicitad en dus centers da transit. Cumenzar cumenza il center da transit Valbella a Litzirüti sonda, ils 24 da settember 2016. Ils 29 d'october 2016 ha lieu ina tala occurrenza en il center da transit Rustico a Laax.

La fin da favrer da quest onn è vegnì mess en funcziun il center da transit Valbella a Litzirüti. Sonda, ils 24 da settember 2016, tranter las 11.00 e las 15.00, avra il center ussa sias portas, e persunas interessadas pon dar in sguard en il center da transit e discurrer cun sias abitantas e ses abitants. Cun grond plaschair e bler engaschi han las requirentas ed ils requirents d'asil preparà in pèr chaussas per questa occurrenza. Las visitadras ed ils visitaders pon sa legrar d'in pitschen viadi cultural e culinaric enturn il mund. I vegnan purschidas delicatessas tipicas da differents pajais. Las visitadras ed ils visitaders survegnan er ina invista dal mintgadi betg adina facil en il center da transit, nua che persunas da las culturas las pli differentas vivan ensemen.


Infurmaziuns:
- Marcel Suter, manader da l'uffizi da migraziun e da dretg civil dal Grischun, tel. 081 257 25 21, e-mail Marcel.Suter@afm.gr.ch  
- Georg Carl, manader da la partiziun "asil ed execuziun", tel. 081 257 25 49, e-mail Georg.Carl@afm.gr.ch  


Gremi: uffizi da migraziun e da dretg civil
Funtauna: rg uffizi da migraziun e da dretg civil