Ils 26 da settember ha lieu il "Di europeic da las linguas" annual. Per la Svizra quadrilingua ed en spezial per il Grischun sco unic chantun triling dat quest di la pussaivladad per render attent a la multifariadad linguistica ed a l'impurtanza da mantegnair e da promover las linguas naziunalas minoritaras.

L'onn 2001 ha il cussegl da l'Europa realisà ensemen cun l'Uniun europeica il "Onn europeic da las linguas". La clera finamira è stada quella da render attent a la multifariadad linguistica e culturala e da prevegnir a la depauperisaziun linguistica. Dapi lura ha lieu mintga onn ils 26 da settember il "Di europeic da las linguas". Tenor il comité dals ministers dal cussegl da l'Europa duai quest di stgaffir la conscienza per:

- la multifariadad linguistica da l'Europa ch'i vala da mantegnair e da promover,
- la necessitad ch'in dumber pli grond da differentas linguas (er main derasadas) vegnia emprendì per promover uschia la plurilinguitad,
- la necessitad da s'acquistar cumpetenzas en duas u en dapli linguas per esser uschia – sco burgais da l'Europa democratica – cumplainamain abel d'agir.

Il cussegl da l'Europa è vegnì fundà l'onn 1949 e cumpiglia oz 47 stadis cun 820 milliuns burgaisas e burgais. En il center da l'activitad stattan ils dretgs umans, la garanzia dals princips democratics sco er ils princips fundamentals dal stadi da dretg.

La Svizra appartegna dapi l'onn 1963 al cussegl da l'Europa ed ha ratifitgà fin ussa dus instruments che pertutgan la multifariadad linguistic-culturala dal pajais: la "charta europeica da las linguas regiunalas u minoritaras" (1997) e la "convenziun da basa per proteger las minoritads naziunalas" (1998). Per tuttas duas chartas consegna la Svizra periodicamain rapports che infurmeschan er detagliadamain davart las mesiras per mantegnair e per promover las duas linguas minoritaras chantunalas rumantsch e talian.

Il "Di europeic da las linguas" vegn coordinà en Svizra da la conferenza svizra dals directurs chantunals da l'educaziun publica (CDEP). En il center stattan oravant tut activitads en scola, per las qualas vegn mess a disposiziun il material d'instrucziun correspundent (link). Ulteriuras infurmaziuns davart il Di da las linguas sa chattan sin la pagina d'internet uffiziala dal cussegl da l'Europa (link).


Infurmaziuns:
Ivo Berther, responsabel per la promoziun da linguas, tel. 081 257 48 06, e-mail Ivo.Berther@afk.gr.ch


Gremi: uffizi da cultura
Funtauna: rg uffizi da cultura