Giusep Defuns daventa nov parsura da la direcziun da las tschintg autoritads per la protecziun d'uffants e da creschids (APUC) dal Grischun. Pervia da questa elecziun vegn la sedia da la direcziun da las APUC transferida a Glion. Ultra da quai tiran las APUC dal chantun Grischun ina bilantscha positiva da lur lavur.

En il chantun Grischun po vegnir tratga – suenter stgars 4 onns – ina bilantscha positiva da l'activitad da las tschintg autoritads per la protecziun d'uffants e da creschids fin ussa. La structura da la nova autoritad ha pudì s'etablir bain. Las mesiras dal dretg vegl da las anteriuras autoritads tutelaras han pudì vegnir transferidas a temp. Il dumber da persunas creschidas ch'èn pertutgadas d'ina mesira da la APUC è restà stabil durant ils emprims 3 onns dapi la transfurmaziun. Il dumber da plazzaments uffizials da persunas minorennas è schizunt sa reducì cleramain per var 20 pertschient dapi l'onn 2012. Quai sto en emprima lingia vegnir attribuì a la lavur professiunala da las APUC che ha pussibilità blers plazzaments transitorics sin basa voluntara. Quai ha er gì in effect positiv per la vart dals custs. Il dumber total da persunas creschidas e da persunas minorennas pertutgadas sa chatta – mess en relaziun cun la populaziun residenta dal Grischun – sut la media naziunala (persunas creschidas en il Grischun 1,16 pertschient resp. persunas creschidas en Svizra 1,27 pertschient; persunas minorennas en il Grischun 2,25 pertschient resp. persunas minorennas en Svizra 2,74 pertschient).

Nov parsura da la direcziun
Lic. iur. Giusep Defuns che ha 50 onns e ch'è manader da la APUC Surselva ed anteriur commember da la direcziun da las APUC è vegnì elegì sco nov parsura da la direcziun da las APUC dal Grischun. Giusep Defuns che abita a Trun è stà fin la fin da l'onn 2012 president da l'autoritad tutelara da la Surselva. Cun sia elecziun vegn la sedia da la direcziun da las APUC transferida da Cuira a Glion. Plinavant vegnan stgaffidas là las resursas necessarias. Il parsura d'enfin ussa Peter Dörflinger ha transferì sia activitad professiunala en il chantun Appenzell Dador.

Tar las incumbensas da la direcziun da las APUC tutgan la coordinaziun da la collavuraziun, il svilup da la pratica e la garanzia da la qualitad en il sectur da la protecziun d'uffants e da creschids. Ultra da quai è ella l'autoritad centrala per las convenziuns da Den Haag per la protecziun d'uffants e da creschids sco er l'autoritad executiva en cas da repatriaziuns d'uffants. Sco parsura represchenta Giusep Defuns da qua envi la direcziun da las APUC vers anora sco er envers l'autoritad da surveglianza, vul dir il departament da giustia, segirezza e sanadad.

Fotografia agiuntada:

Giusep Defuns, nov parsura da la direcziun da las tschintg autoritads per la protecziun d'uffants e da creschids dal Grischun


Infurmaziuns:
- president da la regenza Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch
- Giusep Defuns, manader da la APUC Surselva e parsura da la direcziun da las APUC dal Grischun, tel. 081 257 62 42, e-mail Giusep.Defuns@kesb.gr.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad