Il 1. da november 2016 entra en vigur la nova lescha chantunala da transparenza, ed uschia vala sin plaun chantunal il princip da transparenza. Las autoritads èn preparadas per l'execuziun. Plinavant è vegnì endrizzà in "post spezialisà per il princip da transparenza" cun in'atgna pagina d'internet, ed in nov video da la chanzlia chantunala respunda las dumondas las pli impurtantas.

Il princip da transparenza conceda a mintga persuna – independentamain da la vegliadetgna, da la naziunalitad e dal domicil – in dretg da survegnir access a documents uffizials. L'access po vegnir refusà mo, sche las leschas prevesan quai u sche interess publics u privats predominants prescrivan da tegnair secret ils documents. Cunter la refusa d'ina dumonda d'access pon ins far recurs.

Ina dumonda d'access a documents uffizials sto vegnir inoltrada en scrit a l'autoritad cumpetenta. La dumonda na sto betg vegnir motivada, sto dentant designar bain avunda il document uffizial giavischà. Sch'il tractament d'ina dumonda chaschuna lavur e custs considerabels, vegn incassada ina taxa. Uschiglio è l'access gratuit.

Preparà l'execuziun
L'execuziun da la lescha da transparenza fa tschertas pretensiuns a las autoritads administrativas. Per quest intent èn las persunas responsablas sa preparadas a chaschun d'ina occurrenza d'infurmaziun e da scolaziun d'in di. Ad ellas stattan er a disposiziun differents agids d'execuziun sco in mussavia, glistas da controlla, schemas dals andaments e models.

Tar la chanzlia chantunala è plinavant vegnì installà in "post spezialisà per il princip da transparenza" che stat a disposiziun primarmain per sustegnair e per cussegliar las autoritads en connex cun l'applicaziun da la lescha da transparenza. Sin la pagina d'internet dal post spezialisà (www.oeffentlichkeitsgesetz.gr.ch) sa chattan dentant er infurmaziuns e documents (fegl d'infurmaziun e model d'ina dumonda d'access) per las petentas ed ils petents. Plinavant infurmescha in curt video la populaziun davart las pussaivladads ed ils cunfins dal princip da transparenza sco er davart l'andament da la procedura d'access.


Infurmaziuns:
dr. Claudio Riesen, chancelier, tel. 081 257 22 21, e-mail Claudio.Riesen@staka.gr.ch


Gremi: chanzlia chantunala
Funtauna: rg chanzlia chantunala