Nov interpresas pitschnas e mesaunas (IPM) dal Grischun lavuran vi da structuras favuraivlas per famiglias en lur manaschis. Quai fan ellas en il rom d'in project dal post da stab per l'egualitad da las schanzas. Ultimamain èn sa scuntradas las IPM da las regiuns Grischun central, Surselva e Viamala en l'ospital da Tusaun per in segund barat a la maisa radunda.

Per realisar structuras favuraivlas per famiglias dovri mesiras individualas ch'èn concepidas aposta per il manaschi. Dapi la fin da l'onn 2015 sa stentan las IPM d'elavurar e da realisar plans da mesira individuals. En quest connex vegnan ellas accumpagnadas dal Center UND, in center da cumpetenza per realisar la cumpatibilitad da la lavur da famiglia e da gudogn.

Ils 31 d'october 2016 èn las IPM sa scuntradas a la segunda maisa radunda. Sin giavisch da las interpresas è vegnì elavurà – ultra dal barat d'experientschas – il tema "recrutaziun da persunal". Quai suenter ch'il tema "dapli dunnas en il cader" e "co ir enturn cun absenzas da lunga durada" è vegnì mess en il focus.

Rinforzar las regiuns
Il IPM-regio è il product successur dal project da pilot da la Val dal Rain grischuna (2010‑2014). Quella giada han nov IPM da la Val dal Rain grischuna cun circa 700 collavuraturas e collavuraturs elavurà structuras favuraivlas per famiglias. In enritgiment per quest project è il fatg ch'i èn participadas d'ina vart interpresas, nua che quasi mo umens u mo dunnas lavuran, ma da l'autra vart er interpresas cun teams maschadads.

En la proxima fasa dal project vegnan ils resultats analisads ed evaluads ensemen cun las interpresas. La finamira dal program è quella da laschar profitar las IPM localas da las experientschas d'autras firmas e d'autras regiuns da blers onns e da crear ina conscienza per ils aspects economics positivs da cundiziuns da lavur favuraivlas per famiglias. Il project vegn sustegnì dals posts da svilup regiunals e d'ambassaduras e d'ambassadurs regiunals. El vegn finanzià dal chantun Grischun, da la confederaziun e da sponsurs grischuns.

Questas IMP èn da la partida:

En Surselva: Wäscheria Textil Service AG, Glion; Spitex Foppa

En il Grischun central: Bossi und Hemmi AG, Casti; Puracenter AG Spar, Lai; Poltera Holzbau AG, Tinizong

En la Viamala: Bühler Transporte und Recycling AG, Tusaun; ospital da Tusaun; fundaziun Scalottas, Scharàns; CSD Ingenieure AG, Tusaun

Ulteriuras infurmaziuns chattais Vus sut www.stagl.gr.ch, www.und-online.ch e www.berufundfamilie.admin.ch


Infurmaziuns:
Susanna Mazzetta, manadra dal project, post da stab per l'egualitad da las schanzas, tel. 081 257 35 72 / 079 483 74 01, e-mail Susanna.Mazzetta@stagl.gr.ch


Gremi: post da stab per l'egualitad da las schanzas
Funtauna: rg post da stab per l'egualitad da las schanzas