Oz en 90 dis cumenzan ils campiunadis mundials da skis alpin da la FIS 2017 a San Murezzan. Il president da la regenza Christian Rathgeb ha pudì sa persvader gia ussa d'ina buna organisaziun. Al lieu ha el prendì invista e survegnì ina impressiun persunala dal stadi da las preparativas per ils campiunadis mundials.

Sco partenari impurtant dals campiunadis mundials da skis alpin 2017 a San Murezzan sa procura la regenza grischuna ina survista davart las preparativas per l'occurrenza gronda en l'Engiadin'ota. Per Christian Rathgeb, schef dal departament da giustia, segirezza e sanadad, datti numerus puncts cuminaivels da contact en connex cun ils tschintgavels campiunadis mundials da skis alpin a San Murezzan. En il center da quels stat ina planisaziun cun cleras finamiras en il sectur da la segirezza. Spezialmain impurtanta è la collavuraziun da las forzas da segirezza e da las forzas d'acziun da la polizia, da l'armada e da la protecziun civila. Christian Rathgeb è persvadì che quests secturs impurtants èn gia oz bain entretschads.

Quant lunsch che las preparativas èn gia avanzadas, è sa mussà er en la zona d'arrivada a Salastrains. La tribuna d'atschal d'ina autezza da 16 meters è gia construida. I vegnan spetgads qua var 5000 fans da skis per cursa – tut en tut vegnan organisadas 11 cursas da campiunadi mundial durant 2 emnas. A la fin da ses tur ha Christian Rathgeb constatà, ch'ils campiunadis mundials da skis alpin a San Murezzan cumprovian en moda exemplarica la gronda professiunalitad e cumpetenza per realisar occurrenzas grondas da sport. San Murezzan e l'Engiadina paran dad esser pronts tant per ils campiunadis mundials da skis alpin sco er per l'avegnir.

Fotografia:

Il president dal comité d'organisaziun Franco Giovanoli (a sanestra) mussa al president da la regenza Christian Rathgeb la zona d'arrivada a Salastrains


Infurmaziuns:
President da la regenza Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad