La regenza vul profitar dals gieus olimpics e paralimpics d'enviern 2026 sco motors per sviluppar vinavant l'economia e la societad dal chantun en moda duraivla. Infurmaziuns ed arguments impurtants per candidar cun success per ils gieus olimpics 2026 chattan ins ussa sut olympia.gr.ch.

Il temp per furmar l'opiniun è curt. Gia ils 12 da favrer 2017 duai il pievel grischun votar davart in'eventuala candidatura. Sin la pagina d'internet olympia.gr.ch resumescha il departament responsabel, vul dir il departament d'economia publica e fatgs socials (DES), en moda simpla e chapaivla arguments e fatgs impurtants per manar cun success ina candidatura per ils gieus olimpics 2026.

Ultra d'infurmaziuns davart la procedura d'annunzia e davart la finanziaziun da la candidatura dat il DES er respostas a dumondas frequentas (FAQ). La pagina d'internet mussa er, tge ch'è sa midà dapi l'ultima candidatura vi da las cundiziuns generalas e pertge ch'igl è ussa il mument ideal per ina nova candidatura.

La regenza ha buna speranza che las votantas ed ils votants sa laschian persvader da l'attractivitad e dals effects positivs che resultan d'ina candidatura per gieus olimpics e paralimpics d'enviern 2026 en il Grischun.


Infurmaziuns:
cusseglier guvernativ dr. Jon Domenic Parolini, schef dal departament d'economia publica e fatgs socials, tel. 081 257 23 01, e-mail Jondomenic.Parolini@dvs.gr.ch


Gremi: regenza
Funtauna: rg chanzlia chantunala dal Grischun