La regenza è sa decidida per Cuira sco lieu per in futur center da scola auta.

Il center da scola auta duai vegnir realisà a Cuira
La regenza ha decidì ch'in in center da scola auta futur (CSA) saja da realisar en la chapitala chantunala. A Cuira èn vegnidas fatgas ils onns passads investiziuns relevantas en l'infrastructura da scola auta che na pudess betg vegnir bandunada senza avair alternativas adequatas e survegnir ina indemnisaziun finanziala respectiva. Ultra da quai punctuescha er il cussegl da la Scola auta da tecnica ed economia SATE da Cuira ch'in futur CSA stoppia vegnir domicilià en la chapitala chantunala. Plinavant pretenda il cussegl grond cun l'incumbensa Kappeler da realisar il CSA svelt e cun prioritad. Pervia da questas cundiziuns generalas è la regenza vegnida a la conclusiun ch'in center da scola auta stoppia vegnir domicilià a Cuira. En l'ulteriura evaluaziun vegnan perquai resguardadas primarmain las immobiglias Pulvermühle e Neumühle sco sedias a Cuira. Per betg perder ulteriur temp ston ils proxims pass vegnir prendids immediatamain per mauns. Sut la direcziun da l'uffizi chantunal da construcziun auta (UCA) sco er en collavuraziun cun l'uffizi per la furmaziun media-superiura (UMS), cun l'uffizi per economia e turissem (UET) sco er cun ina represchentanza da la scola auta da tecnica ed economia Cuira (SATE Cuira) stoi vegnir examinà, co ch'il futur basegn da surfatscha cumprovà e prognostitgà da la SATE Cuira po vegnir ademplì.

 

Las immobiglias Pulvermühle (a sanestra) e Neumühle (a dretga)


Gremi: regenza
Funtauna: rg chanzlia chantunala dal Grischun