Dals 27 da december 2016 fin ils 12 da schaner 2017 han cumbattì mintga di fin a 100 forzas d'acziun cunter ils incendis da guaud en la Val Mesauc ed en la Val Calanca. Ellas èn vegnidas sustegnidas da helicopters da stizzar dal militar e civils. La collavuraziun tranter las vischnancas pertutgadas ed ils partenaris participads polizia chantunala, pumpiers, servetsch forestal, sanitad, protecziun civila ed armada svizra è stada fitg cooperativa e caracterisada d'ina confidenza vicendaivla. Per l'armada svizra è quai stada l'acziun da stizzar la pli gronda dapi 20 onns.

Pervia da la setgira che ha durà gia dapi mez november hai dà ils 27 e 28 da december 2016 incendis da guaud l'emprim tranter Mesauc e Soazza en la Val Mesauc e l'auter di a Braggio en la Val Calanca. A Mesauc han stuì vegnir evacuadas quatter persunas or da duas chasas d'abitar, ina terza chasa n'è betg pli stada accessibla pervia dal privel da crudada da crappa. L'autovia A13 e la via chantunala H13 èn stadas serradas per in tschert temp pervia dal privel da crudada da crappa. A Braggio è il fieu s'avischinà fin a 50 meters a las chasas d'abitar. Ils incendis han destruì tut en tut bundant 100 hectaras guaud da protecziun. Umans n'èn vegnids donnegiads nagins e la lingia d'auta tensiun Seglias – Soazza, ina lingia europeica impurtanta per il transport d'electricitad, è restada intacta.

Cumpetenza regiunala per il commando – coordinaziun chantunala
Durant tut l'acziun è il commando stà en mauns dals caders regiunals. Durant las emprimas ca. 48 uras ha il schef da la polizia da regiuns da la Val Mesauc manà l'acziun. Suenter che las axas da traffic han puspè pudì vegnir avertas cumplettamain per il traffic e las lingias d'auta tensiun han puspè pudì vegnir messas en funcziun, è il commando vegnì surdà a l'inspectur da pumpiers local. Per coordinar las acziuns da stizzar è l'inschigner forestal regiunal mintgamai cumpetent stà conresponsabel dal cumenzament da las acziuns da stizzar ennà, e quai tant en la Val Mesauc sco er en la Val Calanca. Ils commembers dal stab directiv chantunal responsabels tant per ils pumpiers sco er per il militar e per la protecziun civila èn stads al lieu ed han consultà e sustegnì il commando. Els han coordinà il sustegn tras l'armada ed han procurà che ulteriuras forzas d'acziun e material supplementar dals pumpiers e da la protecziun civila dal Grischun dal nord èn vegnids transportads als lieus dals incendis.

Emprimas enconuschientschas e consequenzas
L'acziun durant la midada da l'onn 2016–2017 ch'è vegnida terminada cun success mussa che la collavuraziun tranter las organisaziuns a glisch blaua, il servetsch forestal, la protecziun civila e l'armada è buna e cumprovada en il Grischun. Durant ils proxims mais vegnan ils participads ad evaluar detagliadamain l'acziun per emprender da las experientschas fatgas e per meglierar las acziuns en cas d'eveniments. Las suandantas emprimas enconuschientschas e consequenzas pon gia vegnir numnadas:

- Las emprimas reacziuns e mesiras dals elements d'acziun locals e regiunals da la polizia, dals pumpiers e dals servetschs da salvament sco er dals inschigners forestals regiunals e dals selviculturs locals èn stadas d'ina impurtanza decisiva per l'ulteriur andament dal cumbat cunter ils incendis. Quels ston vegnir scolads er vinavant e ston survegnir dapli cumpetenzas en cas da tals eveniments gronds. Ils responsabels da las vischnancas e da las regiuns da tut il chantun ston esser en cas da prender las emprimas mesiras en moda autonoma e svelta e metter a disposiziun spert l'infrastructura da commando necessaria.
- La protecziun civila dal Grischun ha pudì cumprovar ch'ella è en cas da sustegnair en moda svelta e polivalenta las forzas d'acziun dals pumpiers e dal servetsch forestal. Ella ha garantì la capacitad d'intervenziun. Las pussaivladads d'ina mobilisaziun svelta e confurma a l'acziun ston vegnir sviluppadas ed optimadas vinavant.
- Senza l'agid da helicopters da stizzar da l'armada n'avessan ils guauds da protecziun da Soazza e da Mesauc betg pudì vegnir protegids. L'armada svizra è sa mussada sco partenaria nuncumplitgada, fidada ed indispensabla. A la buna collavuraziun cun l'armada sto vegnir attribuida – betg mo en in cas sco quest – ina gronda impurtanza, en spezial en il Grischun.


Infurmaziuns:
- cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch
- divisiunari Lucas Caduff, cumandant da la brigada territoriala 3, tel. 058 481 43 43, e-mail Lucas.Caduff@vtg.admin.ch
- Martin Bühler, manader da l'uffizi da militar e da protecziun civila, tel. 081 257 35 22, e-mail Martin.Buehler@amz.gr.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad