La regenza ha prendì posiziun tar ina consultaziun da la cumissiun per economia e taxas dal cussegl naziunal ed ha respundì in recurs da surveglianza.
Taglia sin la plivalur da durada limitada per ina planisaziun pli segira
La regenza ha prendì posiziun tar la francaziun permanenta da la tariffa speziala da la taglia sin la plivalur per prestaziuns d'alloschament. La tariffa speziala per prestaziuns d'alloschament limitada temporarmain è vegnida introducida l'onn 1996 pervia da la situaziun economica difficila da la branscha turistica e prolungada tut en tut tschintg giadas dapi lura. La prolungaziun actuala scada la fin da l'onn 2017. La cumissiun per economia e taxas dal cussegl naziunal vuless ussa dar a la branscha turistica la segirezza che la tariffa speziala na vegnia betg abolida proximamain. Ina minoritad da la cumissiun ha dumandà da prolungar la tariffa speziala fin la fin da l'onn 2020.
La regenza grischuna sustegna cleramain la proposta da francar la tariffa speziala en la lescha per ina durada betg limitada. La tariffa speziala è sa cumprovada dapi 20 onns. Ultra da quai augmentass sia francaziun illimitada la segirezza da planisaziun ch'ils manaschis d'alloschament duvrassan urgentamain. In'ulteriura limitaziun per in temp plitgunsch curt chaschunass in'ulteriura malsegirezza che pegiurass supplementarmain il clima d'investiziun en la branscha d'alloschament e d'hotellaria.
En il Grischun datti circa 900 manaschis d'alloschament che cumpiglian circa 11 pertschient da tut las plazzas da lavur. En nagin auter chantun n'ha la branscha d'alloschament er mo approximativamain la medema impurtanza economica.
La citad da Cuira sto coordinar il project da construcziun concernent il "Gutshaus zur Kante"
La regenza ha prendì posiziun tar il recurs da surveglianza da la Protecziun da la patria dal Grischun dals 3 da mars 2016. Quest recurs da surveglianza è vegnì inoltrà en connex cun la dumonda da la citad da Cuira da sbuvar il "Gutshaus zur Kante" (fegl uffizial da la citad da Cuira dals 19 da favrer 2016). En quest connex ha la Protecziun da la patria dal Grischun fatg valair differentas violaziuns da la lescha: tranter auter ina violaziun da l'obligaziun da coordinaziun tenor la lescha federala davart la planisaziun dal territori, ina cuntravenziun cunter l'obligaziun existenta da far in plan d'areal en il territori pertutgà (territori "Rückenbrecher") ed ina cuntravenziun cunter l'artitgel concernent edifizis degns da vegnir mantegnids da la lescha da construcziun da Cuira.
Ils 26 da favrer 2016 èn ultra da quai vegnidas publitgadas las lavurs da construcziun da la citad da Cuira concernent il schlargiament da la Masanserstrasse per construir in nov vial per il bus e per ils velos, in passape ed in'alea da bostgs (fegl uffizial da la citad da Cuira dals 26 da favrer 2016). Cunter quai ha la Protecziun da la patria dal Grischun fatg recurs ils 15 da mars 2016, menziunond ils medems puncts sco en il recurs da surveglianza.
En ses giudicament dal recurs da surveglianza è la regenza vegnida a la conclusiun ch'i dettia en quest cas in connex fitg stretg tranter il project da via e la chasa che stoppia vegnir sbuvada per realisar quest project. Pervia da quest connex stretg ston il project per schlargiar la via e la sbuvada dal "Gutshaus zur Kante" vegnir coordinads tenor il dretg vertent. La regenza qualifitgescha la nunobservaziun da l'obligaziun da coordinaziun sco gravanta ed ha incumbensà la citad da Cuira da coordinar formalmain e materialmain las duas proceduras en il senn da las disposiziuns vertentas. En quest connex ston ils dus projects vegnir exponids publicamain e scrits ora cuminaivlamain sco "pachet entir".
Val Müstair survegn il consentiment per in project da construcziun
La regenza ha approvà cun in pèr cumplettaziuns e resalvas la revisiun parziala da la planisaziun locala che la vischnanca da Val Müstair aveva concludì ils 27 d'avrigl 2016. Uschia stgaffescha ella las premissas legalas per in project da construcziun en il territori "Palü Daint" tar il vitg da Müstair. Là vegn la firma indigena Li&Co SA ad eriger dus edifizis da producziun sin ses areal. Pervia da las stretgas relaziuns da plazza e per garantir ils andaments manaschials èn previs dus cubus da dus plauns che duain vegnir realisads en quatter etappas da construcziun.
Percunter ha la regenza stuì sistir las midadas dal plan da zonas ch'èn vegnidas concludidas en vista a la construcziun d'ina lodge sin l'areal sper l'hotel Central a Valchava. Questas midadas vegnan tractadas pli tard ensemen cun autras cumplettaziuns dal plan da zonas ch'èn anc necessarias per quest project.
L'areal tar l'hotel Central a Valchava (a sanestra) - L'areal da firma en il territori "Palü Daint" (a dretga)
©Comet Photoshopping ScRL / Dieter Enz
Gremi: regenza
Funtauna: rg chanzlia chantunala dal Grischun