La regenza ha disponì in'audiziun davart l'ordinaziun tar la lescha da sanadad e decidì l'entrada en vigur da la lescha chantunala da chatscha. Ultra da quai ha ella concedì contribuziuns a l'instituziun culturala Origen sco er a favur d'in indriz d'ennavar a Scuol.

Audiziun davart la revisiun totala da l'ordinaziun tar la lescha da sanadad
La regenza ha prendì enconuschientscha dal sboz per ina revisiun totala da l'ordinaziun tar la lescha da sanadad ed ha autorisà il departament da giustia, segirezza e sanadad, da realisar in'audiziun.
Sin basa da la revisiun totala da la lescha da sanadad sto er l'ordinaziun respectiva vegnir revedida. Sin il stgalim da l'ordinaziun na vegn per ordinari betg fatga ina consultaziun. Ma perquai che las midadas da l'ordinaziun pudessan avair en quest cas consequenzas pli grondas, hai parì cunvegnent a la regenza da realisar excepziunalmain in'audiziun davart il sboz da l'ordinaziun tar ils circuls pertutgads. Fin ils 12 d'avrigl 2017 pon tranter auter tut ils ospitals, tut las chasas da persunas attempadas e da tgira sco er tut ils servetschs da spitex dal Grischun prender posiziun davart las midadas. Quai duai garantir che las disposiziuns da l'ordinaziun vegnian concepidas en ina moda pratitgabla. En l'ordinaziun vegnan concretisadas las obligaziuns da las persunas spezialisadas e dals manaschis dal sectur da sanadad.

Entrada en vigur da la lescha chantunala da chatscha
La revisiun parziala da la lescha chantunala da chatscha dals 18 d'october 2016 vegn messa en vigur per il 1. da matg 2017. Midada vegn la chatscha da capricorns. Quella dura da nov dal 1. d'october fin ils 15 da november. Ultra da quai vegnan resguardadas differentas finamiras da l'iniziativa dal pievel "Per ina chatscha etica che sa cumporta cun la natira". Quai pertutga l'aboliziun da la chatscha cun traplas, il tir per regular l'arma da chatscha avant il cumenzament da la chatscha sco er il diever da muniziun senza plum, uschespert che quai po vegnir responsà per motivs da la segirezza e sin basa da ponderaziuns da la protecziun dals animals. Cun mesira vegnan augmentadas las taxas da patenta per la chatscha auta.

L'inscripziun sin la fatschada dal museum d'art dal Grischun vegn allontanada
La regenza incumbensescha l'uffizi da construcziun auta da laschar allontanar l'emblem vi da la fatschada da l'engrondiment dal museum d'art dal Grischun (MAG). Ultra da quai vegn incumbensà l'uffizi da cultura da laschar elavurar la cumparsa communicativa dal museum d'art dal Grischun en tut ils meds da communicaziun areguard il logo/l'emblem e da tegnair quint consequentamain da las trais linguas uffizialas.
En il rom dal concept da communicaziun per il MAG è vegnì sviluppà – ultra da las inscripziuns trilinguas ordinarias – er in signet/logo. I sa tracta d'in emblem, pia d'ina grafica concepida da pleds. L'emblem è vegnì elavurà sco logo per tudestg e na po betg vegnir adattà graficamain en moda adequata en las linguas rumantsch e talian. Quest emblem è er vegnì applitgà sin la fatschada principala da l'engrondiment dal MAG. El dat l'impressiun d'ina inscripziun, bainchapì mo per tudestg. L'uffizi da cultura vegn a repassar la cumparsa communicativa dal MAG pertutgant il logo/emblem. La nova versiun duai tegnair quint da las trais linguas uffizialas. La soluziun la pli evidenta per l'apparientscha da la fatschada da l'engrondiment dal MAG premetta en il futur da desister da l'emblem.

Contribuziuns a l'instituziun culturala Origen
En il rom da la Nova politica regiunala da la confederaziun (NPR) ha la regenza concedì a la Nova Fundaziun Origen ina contribuziun finanziala da 700 000 francs per il "biro da planisaziun e da svilup Origen 2020". Las contribuziuns NPR vegnan surpigliadas mintgamai per la mesadad da la confederaziun e dals chantuns participads.
Il biro da svilup Origen 2020 duai elavurar ina basa fundada per il svilup general dad Origen a Riom. En ils proxims 10 onns vul Origen daventar ina da las instituziuns da teater las pli impurtantas dal territori alpin. Per cuntanscher questa finamira duai il biro da planisaziun e da svilup da la fundaziun planisar, finanziar e realisar las infrastructuras necessarias.
Ultra da quai ha la regenza garantì a la Nova Fundaziun Origen ina contribuziun da deficit da maximalmain 680 000 francs per il "project dal Güglia 2017 – 2020". L'instituziun culturala construescha ina tur babilonica sin il pass dal Güglia sco chasa da teater temporara. Il teater dal Güglia duai avair lieu en tut las stagiuns. Ils programs vegnan planisads e realisads dad Origen. Las emprimas preschentaziuns èn previsas per l'avust 2017.

©Nova Fundaziun Origen

Contribuziun chantunala per in indriz d'ennavar a Scuol
La regenza conceda a las Pendicularas Motta Naluns ina contribuziun chantunala dad 1,3 milliuns francs or dal credit d'impegn per contribuziuns d'investiziun ad infrastructuras relevantas per il sistem, e quai per construir l'indriz d'ennavar a Scuol. Ultra da quai ha ella approvà in sustegn finanzial en il rom da la nova politica regiunala da la confederaziun (NPR) e concedì in emprest NPR da 2 milliuns francs. Sco prestaziun d'equivalenza dal chantun Grischun a l'emprest NPR vegn garantida ina contribuziun da 336 679 francs.

©Pendicularas Scuol SA

Projects da votaziun dals 21 da matg 2017
La regenza ha prendì enconuschientscha dal fatg ch'il suandant project federal vegn suttamess a la votaziun dal pievel la dumengia, ils 21 da matg 2017:
-Lescha d'energia (LEn) dals 30 da settember 2016
Dumengia, ils 21 da matg 2017, na vegni votà davart nagins projects chantunals.


Gremi: regenza
Funtauna: rg chanzlia chantunala dal Grischun