• resultat operativ 16,4 milliuns francs (onn precedent 59,8 milliuns francs)
• resultat total -51,5 milliuns francs (onn precedent 16,7 milliuns francs)
• entradas fiscalas 751,8 milliuns francs (onn precedent 744,2 milliuns francs)
• resultat dal quint da las vias -8,5 milliuns francs (onn precedent 3,4 milliuns francs)
• investiziuns nettas 207,2 milliuns francs (onn precedent 163,3 milliuns francs)

Resultat operativ allegraivel
En il sectur da manaschi è il resultat per 68,9 milliuns francs meglier che budgetà. Quai pervia dals custs pli bass (-61,4 milliuns francs) e dals retgavs levamain pli auts (+7,5 milliuns francs). Ensemen cun il resultat da finanziaziun resulta in surpli dal retgav da 16,4 milliuns francs (onn precedent: 59,8 milliuns francs) en il resultat operativ (quint economic 1. stgalim).

Envers l'onn precedent resulta ina diminuziun dal surpli operativ da 43,4 milliuns francs. Questa reducziun sa lascha declerar cun quatter posiziuns:
1. L'onn 2016 ha la banca naziunala svizra fatg ina distribuziun ordinaria da la quota da gudogn, l'onn precedent avevi dà ina distribuziun dubla (-16,1 milliuns francs).
2. L'onn 2016 ha il chantun survegnì 17,3 milliuns francs main pajaments da gulivaziun da la gulivaziun federala da finanzas (NGF).
3. La nova gulivaziun da finanzas dal Grischun è entrada en vigur l'onn 2016 ed ha engrevgià il resultat cun stgars 15 milliuns francs.
4. Pervia da la producziun pli bassa l'onn 2016 hai dà main tschains d'aua (-9,1 milliuns francs).

Las entradas fiscalas da totalmain 751,8 milliuns francs han surpassà quellas da l'onn precedent (744,2 milliuns francs) per bundant 1 pertschient ed èn fitg datiers da la valur budgetada (753,3 milliuns francs). Las taglias sin las entradas e sin la facultad da las persunas natiralas han cuntanschì 483,3 milliuns francs. Il preventiv (502,3 milliuns francs) è pia stà memia ambizius. Questa largia è vegnida serrada cun las taglias da las persunas giuridicas (93,0 milliuns francs, 8,3 milliuns francs dapli ch'en il preventiv) e cun las ulteriuras taglias (175,5 milliuns francs, 9,2 milliuns francs dapli ch'en il preventiv).

Da la vart dals custs n'èn betg tut ils credits tenor il preventiv vegnids exaurids. Las differenzas las pli grondas envers il preventiv hai dà en connex cun las contribuziuns a communitads ed a terzas persunas (-20,8 milliuns francs), cun las contribuziuns d'investiziun (amortisaziuns -10,8 milliuns francs), cun las amortisaziuns sin la facultad administrativa (-11,7 milliuns francs), cun ils custs materials e cun ils ulteriurs custs da manaschi (-7,6 milliuns francs) sco er cun ils custs da persunal (-4,6 milliuns francs). Las divergenzas dal preventiv da -2,5 pertschient tar ils custs da manaschi resp. da +0,3 pertschient tar il retgav da manaschi mussan che la planisaziun è fitg exacta.

La finanziaziun speziala «vias» serra cun in surpli d'expensas da 8,5 milliuns francs (preventiv: 19,9 milliuns francs). Las expensas totalas sa chattan cun 327,5 milliuns francs sin il nivel da l'onn precedent (328,4 milliuns francs). Il dabun da las vias è per la fin da l'onn 2016 sin il maximum legal da 100 milliuns francs.

Las grondas fluctuaziuns dals curs influenzeschan il resultat extraordinari
Las grondas fluctuaziuns dals curs da las investiziuns finanzialas dal chantun han pretendì correcturas correspundentas da las valurs cudeschadas en la bilantscha. Quellas vegnan cudeschadas sur il success extraordinari. Entant che la valur dals certificats da participaziun da la banca chantunala grischuna è s'augmentada fermamain l'onn precedent (+111,6 milliuns francs), han stuì vegnir fatgas durant l'onn da gestiun adattaziuns en l'autra direcziun
(-86,9 milliuns francs). Quai pervia da la sminuziun dal curs. Las aczias da la Repower ch'il chantun posseda, èn medemamain vegnidas valitadas tenor la valur da bursa media a la fin da l'onn e bilantschadas cun 85,1 milliuns francs (-4,5 milliuns francs). Il curs da las aczias da la Ems-Chemie Holding SA è puspè s'augmentà marcantamain ed ha generà in retgav finanzial extraordinari da 19,2 milliuns francs en il quint chantunal.

Resultat total sco budgetà
Il resultat total sco summa dal resultat operativ e dal resultat extraordinari correspunda al deficit budgetà da var 51 milliuns francs. Suenter avair cudeschà la perdita annuala e resguardond las retenziuns ch'èn vegnidas schliadas per obligaziuns da contribuziun pendentas importa l'agen chapital cumprovà 2298 milliuns francs. La gronda part da quel è liada en l'infrastructura ch'è necessaria per il manaschi sco er en finanziaziuns spezialas ed en reservas. L'agen chapital che stat a libra disposiziun importa circa 345 milliuns francs.

Autas investiziuns dal chantun sco pitga fidada da l'economia grischuna
Cun investiziuns nettas da 207,2 milliuns francs suttastritga il chantun sia politica d'investiziun permanenta. Il preventiv (251,4 milliuns francs) n'ha betg pudì vegnir exaurì en tut ils secturs. En spezial las expensas per ils projects da construcziun auta e bassa planisads e currents èn per part cleramain pli bassas che planisà. Questas expensas resultan dentant simplamain pli tard. Il medem vala per singulas contribuziuns d'investiziun a terzas persunas (147,6 milliuns francs, preventiv 159,9 milliuns francs) che dependan dal progress da realisaziun dals projects sustegnids tar las communitads e tar las instituziuns retschavidras.

Perspectiva
Per l'onn 2017 po vegnir spetgà almain in resultat gulivà. Budgetà è in deficit da 20 milliuns francs. Per tegnair en equiliber las finanzas chantunalas er a pli lunga vista persequitescha la regenza ina politica da finanzas tenor prioritads severas. Sco emprim vali da mantegnair ina gronda disciplina d'expensas per ademplir las valurs directivas da la politica da finanzas ch'il cussegl grond ha fixà per la perioda 2017–2020. Uschia duessan pudair vegnir observadas ils onns 2018 e 2019 las valurs directivas prescrittas. Grondas sfidas vegnan a resultar a partir da l'onn 2020. En vista al pegiurament da las perspectivas vegnan actualmain eruids en lung ed en lartg ils chaschunaders da custs en las finanzas chantunalas. Silsuenter duain vegnir elavuradas mesiras per augmentar la libertad finanziala d'agir dal cussegl grond, en spezial en il sectur da las contribuziuns.
 
Il cussegl grond vegn a tractar il quint annual 2016 en la sessiun da zercladur 2017.


Agiuntas:
Agiunta a la communicaziun a las medias: Bilantscha
Agiunta a la communicaziun a las medias: Quint economic
Agiunta a la communicaziun a las medias: Quint d'investiziun

Ulteriuras infurmaziuns: departament da finanzas e vischnancas

Infurmaziuns:
Presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01, e-mail Barbara.Janom@dfg.gr.ch


Gremi: departament da finanzas e vischnancas
Funtauna: rg departament da finanzas e vischnancas