Suenter in onn da planisaziun intensiv per il project da construcziun e per la realisaziun vegn il cumenzament uffizial da las lavurs da construcziun dal nov center administrativ "sinergia" lantschà cun l'emprima badigliada. La realisaziun da l'ovra da construcziun vegn a durar circa trais onns. Igl è previs d'avrir il center administrativ la primavaira 2020.

En in'emprima etappa vegnan reunidas 400 plazzas da lavur en in nov edifizi a Cuira vest. L'intent dal nov edifizi è quel da trair a niz il meglier pussaivel sinergias, d'optimar andaments, d'augmentar la flexibilitad da l'utilisaziun dals locals sco er da reducir il basegn general da surfatscha. Las surfatschas e lur utilisaziun influenzeschan decisivamain ils custs d'investiziun ed han in effect considerabel sin ils custs da gestiun. Planisà e realisà vegn il project da construcziun dal team da planisaders generals Implenia Svizra SA / Dieter Jüngling + Andreas Hagmann, architects da Cuira. Ils custs importan tut en tut circa 72 milliuns francs.

Il plan da quartier necessari "sinergia" è vegnì approvà ils 17 da matg 2016 da la citad da Cuira. La permissiun da construcziun è vegnida concedida il 1. da fanadur 2016.

En stretga collavuraziun tranter tut las varts participadas al project dal team da planisaders generals, las utilisadras ed ils utilisaders futurs e l'uffizi da construcziun auta èn vegnids elavurads en il decurs da l'ultim onn il project da construcziun ed ils plans d'execuziun. Las emprimas publicaziuns uffizialas da lavurs per quest project da construcziun d'impurtanza per l'economia regiunala èn vegnidas fatgas l'atun 2016. Las lavurs per la construcziun brutta e per la tecnica da chasa èn vegnidas surdadas per gronda part ad interpresas localas.

Project d'execuziun
Il project che ha gudagnà la concurrenza da planisaziun persvada tant funcziunalmain sco er architectonicamain. La realisaziun da l'edifizi en standard da Minergie-P-Eco permetta da construir en moda energeticamain effizienta e schanegiond las resursas.
Tut en tut 14 differentas unitads d'organisaziun (dus departaments e 12 posts da servetsch) vegnan a sa chasar en il nov edifizi administrativ "sinergia". Las plazzas da lavur vegnan realisadas per gronda part cun structuras spazialas avertas (open space, multi space) tenor las enconuschientschas las pli novas areguard l'acustica, areguard l'utilisaziun dal cler dal di ed areguard l'organisaziun da la lavur. Cumplettadas vegnan quellas cun zonas d'inscunter, cun locals centrals e cun zonas da servetsch. L'organisaziun dal plan orizontal ed il palantschieu dubel permettan ina gronda flexibilitad spaziala e pussibiliteschan midadas futuras. Las tecnologias d'infurmaziun pon vegnir adattadas senza problems al stadi da la tecnica. Ils vehichels dals posts da servetsch vegnan remplazzads tras in pool da vehichels che funcziunan sche pussaivel cun electricitad. Medemamain vegnan mess a disposiziun a las collavuraturas ed als collavuraturs e-bikes e velos per viadis da lavur entaifer la citad da Cuira.

La strategia chantunala d'immobiglias prevesa centers regiunals ferms
La realisaziun dal center administrativ "sinergia" a Cuira fa part da la strategia chantunala d'immobiglias. Quella prevesa d'installar totalmain nov centers regiunals ferms ch'èn repartids en tut il chantun. Tras la concentraziun e tras standards moderns per las localitads èsi pussaivel d'augmentar il niz per la clientella e da reducir en moda durabla las surfatschas ed ils custs. A Glion, Roveredo, Tusaun, Tavau, Scuol e Landquart ha il chantun gia reunì cun success l'administraziun. Er a Samedan ed a Puschlav duain vegnir realisads ulteriurs centers administrativs entaifer ils proxims onns.

Realisaziun dal project en etappas
Il concept da realisaziun "sinergia", ch'è planisà per il lieu d'administraziun Cuira, prevesa da spustar tut en tut 670 plazzas da lavur a Cuira vest e duai vegnir realisà en duas etappas separadas. En l'emprima etappa da realisaziun duain las unitads d'organisaziun che han il pli grond basegn d'agir, vegnir dischlocadas en il nov edifizi administrativ a la Ringstrasse / Salvatorenstrasse cun var 400 plazzas da lavur. En ina segunda etappa, che sto puspè vegnir suttamessa al parlament ed al pievel avant ch'ella po vegnir realisada, duain vegnir endrizzadas 270 ulteriuras plazzas da lavur.
Il project "sinergia" na prevesa ni d'augmentar il dumber total da collavuraturas e collavuraturs da l'administraziun chantunala ni da dischlocar plazzas da lavur dals ulteriurs centers regiunals en la chapitala chantunala.

Agiunta:
Bauinformation (nur deutsch)


Infurmaziuns:
- Cussegl guvernativ dr. Mario Cavigelli, tel. 081 257 36 01, e-mail Mario.Cavigelli@bvfd.gr.ch
- Markus Dünner, architect chantunal, tel. 081 257 36 31, e-mail Markus.Duenner@hba.gr.ch


Gremi: uffizi da construcziun auta dal Grischun
Funtauna: rg uffizi da construcziun auta dal Grischun