La regenza ha deliberà in credit per in project dals parcs natirals grischuns. Ultra da quai ha ella approvà la revisiun parziala da la vischnanca da Tavau ed in project d'exposiziun per la correcziun da la via chantunala en la Val Lumnezia.
Parcs natirals grischuns dattan dapli en egl
La regenza ha prendì enconuschientscha dal project "Infurmaziun parcs Grischun" da l'uniun parcs grischuns. Il medem mument ha la regenza deliberà in credit brut d'in import da 459 000 francs per sviluppar e per realisar il project.
Dapi il cumenzament da l'onn 2017 sa preschentan ils parcs grischuns cun "graubündenPARCS" sco partenaris da la marca graubünden. Ils parcs grischuns coopereschan ultra da quai cun Grischun vacanzas e realiseschan activitads communicativas cuminaivlas en connex cun il project "Destinaziun natira". L'uniun parcs grischuns vuless ussa integrar pli fitg en in concept general questas activitads ch'èn sa sviluppadas per part casualmain. Cun il project "Infurmaziun parcs Grischun" duai ussa vegnir considerà l'entir chantun. En il rom dal project vegni mussà co ch'i po vegnir infurmà e communitgà en moda coordinada ed orientada a la visitadra ed al visitader davart ils parcs en il chantun Grischun. Uschia duai vegnir augmentada d'ina vart la visibilitad dals parcs e da l'autra vart duain las visitadras ed ils visitaders sco er las persunas indigenas survegnir en ina moda simpla ed attractiva infurmaziuns davart ils parcs grischuns.
Alp Anarosa en il Parc natiral Beverin
©ZHAW / Parc natiral Beverin, Frank Brüderli
Midada dal plan per in abitadi da vacanzas a Tavau
La regenza ha approvà la revisiun parziala da la planisaziun locala da la vischnanca da Tavau dals 27 da november 2016. L'object dal plan d'utilisaziun approvà è la fixaziun d'in areal "hotel" per tut ils bains immobigliars da l'abitadi da vacanzas "Solaria" en il territori "Büel".
Tar l'abitadi da vacanzas "Solaria" sa tracti d'in manaschi d'alloschament sumegliant ad in hotel. La Solaria Tavau SA ha l'intenziun d'extender la purschida existenta per giasts cun locals generals sco recepziun u locals da meeting. La supraposiziun da las parcellas da l'abitadi da vacanzas "Solaria" cun in areal "hotel" gida ch'in ulteriur svilup adequat da l'abitadi da vacanzas sco manaschi sumegliant ad in hotel è pussaivel.
©Comet Photoshopping ScRL / Dieter Enz
Engrondiment da la via chantunala en la Val Lumnezia
La regenza ha approvà il project d'exposiziun per la correcziun da la via da la Lumnezia, traject Porclas – Valgronda, cun intginas cundiziuns sco er cun las permissiuns spezialas. Davant l'entrada en il vitg da Cumbel è quest traject da la via chantunala per part stretg, nunsurvesaivel e na correspunda betg pli als basegns actuals ed a las pretensiuns da segirezza modernas. Sin ina lunghezza totala da var 620 meters vegn perquai en emprima lingia schlargiada la via a la ladezza da norma da 5,8 meters. Plinavant vegnan meglierads il sistem da l'allontanament da l'aua e la surstructura da la via sco er il trassé en ils secturs nunsurvesaivels.
Contribuziun per renovar ina via agricula a Schiers
La regenza garantescha a la vischnanca da Schiers ina contribuziun chantunala da maximalmain 340 065 francs als custs per renovar la via champestra nr. 8, Rainstrasse. Questa contribuziun chantunala vegn deliberada sin basa d'ina contribuziun federala precedenta da maximalmain 423 650 francs. Tenor las disposiziuns vertentas importa la contribuziun chantunala per mesiras cuminaivlas per meglierar las structuras en l'agricultura 90 pertschient da la contribuziun fundamentala da la confederaziun. Ils custs subvenziunabels per renovar questa via champestra agricula importan maximalmain 1 145 000 francs.
Gremi: regenza
Funtauna: rg chanzlia chantunala dal Grischun