La regenza ha prendì posiziun tar dus projects da consultaziun da la confederaziun. Plinavant ha ella constatà che duas iniziativas chantunalas dal pievel èn reussidas ed ha approvà differents projects da construcziun.

La taxa minimala per la taxa d'exemziun dal servetsch militar duai vegnir mantegnida
La regenza ha prendì posiziun tar il sboz da l'administraziun federala da finanzas per ina revisiun parziala da la lescha federala davart la taxa d'exemziun dal servetsch militar (LTES). En spezial duain vegnir midads ils suandants puncts da la lescha: La durada da l'obligaziun da cumpensaziun duai vegnir adattada al nov dretg da militar e da servetsch civil e l'obligaziun da pajar la taxa d'exemziun pervia dal spustament da la scola da recrut duai vegnir abolida.
La regenza grischuna sustegna da princip quest sboz. Ella s'exprima però en moda sceptica envers la bloccada dals documents d'identitad en cas che la taxa na vegn betg pajada u en cas che las garanzias per las taxas d'exemziun dal servetsch militar debitadas mancan. La regenza grischuna è da l'avis che la bloccada dals documents d'identitad per garantir l'incassament da la taxa d'exemziun dal servetsch militar è in instrument objectivamain sproporziunà e chaschunass ultra da quai lavur sproporziunada per l'administraziun e per las dretgiras.
La regenza sustegna percunter da laschar la taxa minimala tar 400 francs, in auzament refusa ella. La media da la taxa da cumpensaziun importa 680 francs. In augment da la taxa minimala per duas giadas e mez n'è betg commensurà. In augment da quest gener tutgass en emprima lingia quellas persunas che ston pajar la taxa d'exemziun che n'han naginas entradas u mo entradas minimalas.

Link: Documents da consultaziun da la confederaziun

La rolla da surveglianza dal chantun na dastga betg vegnir indeblida
La regenza ha prendì posiziun tar il sboz da la revisiun totala da l'ordinaziun dal departament federal d'economia, furmaziun e retschertga davart las prescripziuns minimalas per la renconuschientscha da furmaziuns e da studis da diplom supplementar da las scolas spezialisadas superiuras. La finamira da la revisiun è quella d'examinar e da sclerir las structuras, ils process e las responsabladads dals acturs. La regenza grischuna suonda la posiziun da la conferenza svizra dals uffizis per la furmaziun professiunala CSFP. La regenza e la CSFP sustegnan il sboz. Ellas èn però da l'avis che la rolla e la responsabladad dals chantuns vegnian represchentadas insuffizientamain en il sboz da l'ordinaziun.
Cun l'argument da simplifitgar la surveglianza dals chantuns vegnan ils chantuns privads da lur incumbensa da surveglianza essenziala ed uschia er da lur responsabladad definida giuridicamain. Cun realisar l'ordinaziun revedida han ils chantuns mo pli la posiziun dals "sponsurs".
Per quest motiv pretendan la regenza grischuna e la CSFP in'ulteriura discussiun da la rolla futura dals chantuns e proponan in model da surveglianza alternativ. Ils experts – e quai en spezial quels ch'èn gia engaschads sin plaun naziunal tar la procedura da renconuschientscha – duain valitar ils studis per incumbensa dals chantuns.

Link: Documents da consultaziun da la confederaziun

Las iniziativas dal pievel "Buna scola grischuna" èn reussidas
Gist duas iniziativas chantunalas dal pievel èn vegnidas inoltradas tar la chanzlia chantunala ils 15 da mars 2017: l'iniziativa dal pievel "Buna scola grischuna – cundecisiun en dumondas impurtantas da la furmaziun" e l'iniziativa dal pievel "Buna scola grischuna – cundecisiun tar ils plans d'instrucziun". Omaduas iniziativas èn vegnidas redigidas en furma d'in sboz elavurà. La regenza grischuna ha constatà che omaduas iniziativas han il dumber necessari da suttascripziuns ed èn pia reussidas.
Per l'iniziativa dal pievel "Buna scola grischuna – cundecisiun en dumondas impurtantas da la furmaziun" èn stadas necessarias 4000 suttascripziuns (midada da la constituziun chantunala). Tut èn tut èn vegnidas inoltradas 4199 suttascripziuns valaivlas. Per l'iniziativa dal pievel "Buna scola grischuna – cundecisiun tar ils plans d'instrucziun" èn stadas necessarias 3000 suttascripziuns (midada d'ina lescha). Tut èn tut èn vegnidas inoltradas 3956 suttascripziuns valaivlas. Resguardond ils termins legals vegnan las iniziativas surdadas al departament d'educaziun, cultura e protecziun da l'ambient per l'ulteriura elavuraziun en il rom dals conclus da princip da la regenza.

La via dal Güglia vegn sanada en il sectur da la punt da Bardella
La regenza ha approvà il project per renovar la via dal Güglia, traject da la punt da Bardella fin a l'access da Murmarera, cun intginas cundiziuns sco er cun las permissiuns spezialas. Cun la correcziun da la via vegn il sectur dal project da la via dal Güglia adattà al standard actual. Il medem mument vegn eliminada la stretga tar la punt da Bardella ed il trassé en il sectur da la storta e da l'access da Murmarera vegn meglierà. La plazza ch'il nov vial per sviar a sanestra dovra, il schlargiament da la storta e la topografia pretensiusa da la cuntrada pretendan novas construcziuns artifizialas da la vart da la val. La via principala da dus vials vegn schlargiada ad ina ladezza da 7 meters. Il trassé vegn pli survesaivel ed è meglier percurschibel per il participant dal traffic. Er la segirezza per las pedunas ed ils peduns vegn meglierada grazia al nov plazzament da la fermada da l'auto da posta. Tut en tut custa il project circa 8 milliuns francs.

La stretga tar la punt da Bardella po vegnir eliminada

In traject da la via dal Flüela sto vegnir renovà
La regenza ha approvà il project per reparar la via dal Flüela, traject Punt Pignai – Pra d'Less Sura, cun tschertas cundiziuns e cun las permissiuns spezialas. Il traject d'ina lunghezza da 980 meters da la via dal pass è en in nausch stadi general. D'agiuntar èsi ch'en la storta da quest traject n'èsi betg pussaivel per camiuns da las dimensiuns odiernas da sviar da la vart, sch'els sa scuntran là. Il project da via approvà cumpiglia perquai – ultra da la renovaziun e dal rinforzament da la via – er il schlargiament uschè constant sco pussaivel da tala a 6 meters.

La storta vegn schlargiada per che camiuns possian cruschar senza problems

Ils stabiliments accessorics da las Ovras electricas Zervreila vegnan sanads
La regenza ha approvà in project da las Ovras electricas Zervreila SA per sanar ils stabiliments accessorics dal mir da serra Zervreila a Val S. Pieder cun in pèr cundiziuns e pretensiuns. Il mir da serra Zervreila è vegni mess en funcziun l'onn 1958. Suenter stgars 60 onns da gestiun ston differentas parts dal stabiliment vegnir renovadas. Planisadas èn differentas lavurs da sanaziun e da renovaziun vi dal batschigl da gulivaziun, vi dal scul da basa dal mir da serra, vi dal scul da dotaziun sco er vi dal conduct da l'aua da dotaziun e da manaschi. Ultra da quai duai vegnir installà tras il mir da serra in nov conduct da derschentada da sediments. Las lavurs da sanaziun dals stabiliments accessorics dal mir da serra Zervreila vegnan exequidas senza svidar il lai. Previs èsi mo da sbassar il lai, cur che quai è necessari.

Gremi: regenza
Funtauna: rg chanzlia chantunala dal Grischun