Suenter ina fasa da planisaziun intensiva vegni cumenzà ils proxims dis cun las lavurs da demoliziun da la halla da la resgia sin l'anteriur areal da resgia Vial a Domat. L'areal "Parc industrial Vial" vegn duvrà per interpresas che han ina valurisaziun intensiva e ch'èn orientadas a l'export. La Hamilton Domat SA è gia cumplainamain en la fasa da construcziun ed ha lantschà l'utilisaziun industriala da l'areal.

A partir da glindesdi vegnan a cumparair sin l'areal Vial/Tuleu ulteriurs chavaterras: Cun quai fa il chantun il pass da la fasa da planisaziun a la fasa da realisaziun cumenzond cun las lavurs da demoliziun e d'avertura. Exceptada da quai resta la surfatscha parziala da la "opziun resgia" determinada en il plan da furmaziun al vest da l'areal. L'incumbensa da demolir la halla da la resgia ha il chantun surdà a la Käppeli's Söhne Cuira en ina procedura averta. Plinavant èsi planisà d'allontanar la cuvrida ed ils conducts d'ovra che na vegnan betg pli duvrads e d'inverdir la surfatscha cun tschispet sin gera. Uschia survegn il parc industrial Vial ina concepziun che renda giustia a las pretensiuns envers in lieu industrial attractiv e che reflectescha la gronda valur da las interpresas che prendan là lur domicil. Il cumenzament da las lavurs da construcziun da la via d'avertura è previs per l'emprima stad 2017.

Surfatschas industrialas disponiblas sco factur impurtant dal lieu
Terren industrial per novas domiciliaziuns en in lieu bun e central è in avantatg economic impurtant da la Svizra. Perquai promova il chantun dapi onns il svilup da surfatschas per interpresas orientadas a l'innovaziun ed a l'export. Cun il parc industrial Vial vegn creada ina da las pli grondas zonas industrialas accessiblas da la Svizra. Ulteriuras zonas industrialas ch'èn adattadas per interpresas d'auta tecnologia datti en il Grischun tranter auter a Landquart/Zizers (Tardisland), Cuira, San Vittore, Cazas e Fideris.

La Hamilton Domat SA sa chatta gia amez la fasa da construcziun
Dapi in pèr emnas stattan cranas sin il nov parc industrial Vial: La Hamilton Domat SA ha gia cumenzà cun las lavurs da construcziun per ses nov lieu da manaschi a Domat e lantschà l'utilisaziun industriala da l'areal. En ils novs edifizis vegn la Hamilton Domat SA ad endrizzar ina producziun d'auta tecnologia per construir products da diever intelligents en il senn da l'industria 4.0. Ella investescha circa 35 milliuns francs e stgaffescha circa 100 plazzas da lavur.


Infurmaziuns:
cusseglier guvernativ dr. Jon Domenic Parolini, tel. 081 257 23 01, e-mail Jondomenic.Parolini@dvs.gr.ch


Gremi: departament d'economia publica e fatgs socials
Funtauna: rg departament d'economia publica e fatgs socials