"Prenda tuttina il velo!" è il messadi central d'ina campagna da placats che l'uffizi da construcziun bassa dal Grischun realisescha il cumenzament da matg 2017 en la Val dal Rain grischuna. Sin paraids da placats da Razén fin a Landquart vegnan pendids trais differents motivs da placat che duain render conscient a la populaziun ils avantatgs dal velo sco med da transport quotidian.

Ils placats èn in'acziun da sensibilisaziun en il rom dal plan chantunal da mesiras per l'igiena da l'aria, ch'è vegnì elavurà sut la direcziun da l'uffizi per la natira e l'ambient e deliberà da la regenza il december 2016. Quel cuntegna in agen fegl da mesiras per il traffic da velos. Ils uffizis cumpetents da l'administraziun chantunala vegnan incumbensads da promover il traffic pendular cun velo.
Ma, co fan ins da motivar las persunas da pendular a la lavur cun velo? Vias da velos segiras, confortablas e nuninterruttas sco er parcadis da velos cuvrids èn premissas fundamentalas per quai, na bastan però betg sulettas. Mo sch'ins daventa conscient dals aspects positivs da l'ir cun velo, van ins er pli e pli cun velo a la lavur. Exact quai è il punct da partenza da la campagna da placats. Il slogan "Prenda tuttina il velo!" collia quests aspects cun intgins avantatgs ch'il pendular cun velo ha: Metter il chau a l'aria ed emblidar il mintgadi da lavur, sa mover en il liber e percepir la natira sco er avanzar svelt sin vias cun pauc traffic.
"Prenda tuttina il velo!" è l'emprima acziun chantunala da quest gener e sa drizza a l'aglomeraziun da Cuira che ha il potenzial il pli grond per il traffic pendular betg motorisà.

Fotografia agiuntada:

Exempel da la campagna da placats "Prenda tuttina il velo!"


Infurmaziuns:
Peter Oberholzer, manader da project per il traffic betg motorisà, uffizi da construcziun bassa dal Grischun, tel. 079 339 48 82, e-mail Peter.Oberholzer@tba.gr.ch


Gremi: uffizi da construcziun bassa dal Grischun
Funtauna: rg uffizi da construcziun bassa dal Grischun