Pliras represchentantas e plirs represchentants da la politica e da l'economia èn sa mess il glindesdi ad ina maisa radunda cuminaivla. En vista a la proxima votaziun dal pievel ils 21 da matg 2017 èn vegnidas discutadas fatschentas actualas da la politica d'energia dal plaun federal.

A la maisa radunda èn sa scuntrads a Cuira la presidenta da la regenza Barbara Janom Steiner ed il cusseglier guvernativ Mario Cavigelli cun las parlamentarias ed ils parlamentaris federals Stefan Engler, Martin Schmid, Silva Semadeni, Martin Candinas e Duri Campell sco er cun il secretari general da la conferenza da las regenzas dals chantuns alpins (CRCA) Fadri Ramming e cun ils represchentants chantunals en ils cussegls administrativs da las societads d'ovras electricas per tractar la strategia d'energia 2050. Da la partida èn er stads il president Not Carl ed ulteriurs commembers da la suprastanza da la cuminanza d'interess da las vischnancas concessiunaras dal Grischun sco er represchentants da l'administraziun. A questa maisa radunda èsi vegnì discutà davart fatschentas actualas da la politica d'energia dal plaun federal.

En il rom d'ina vasta preschentaziun generala han las participantas ed ils participants pudì barattar lur opiniuns e definir lur posiziuns cuminaivlas davart las sfidas futuras per il chantun e per las vischnancas per rinforzar la forza idraulica e per segirar ils tschains d'aua. Incontestà è stà il fatg ch'ina vieuta energetica senza la forza idraulica na saja betg realisabla e che l'impurtanza da questa funtauna d'energia regenerabla stoppia er vegnir renconuschida sin plaun federal.

Fotografia agiuntada:

Infurmaziuns:
Cusseglier guvernativ dr. Mario Cavigelli, tel. 081 257 36 01, e-mail Mario.Cavigelli@bvfd.gr.ch


Gremi: departament da construcziun, traffic e selvicultura
Funtauna: rg departament da construcziun, traffic e selvicultura