Ils novs edifizis da l'orticultura per il stabiliment giudizial avert Realta pon vegnir retratgs. Els furman la finiziun da l'emprima etappa da construcziun d'in nov stabiliment per l'execuziun giudiziala serrà sin l'areal da l'anteriura orticultura.

Suenter in temp da construcziun da 9 mais po vegnir avert en il nov lieu l'edifizi da vendita e d'elavuraziun che ha serras che cunfineschan da trais varts cun l'edifizi. La construcziun dal nov stabiliment per l'execuziun giudiziala serrà permetta da realisar in project da construcziun d'impurtanza per l'economia regiunala cun 152 plazzas per praschuniers e cun 80 plazzas da lavur supplementaras en la regiun da la Mantogna/Tumleastga.

Legums per ils praschuniers e per la populaziun
En las novas serras vegnan cultivads legums da stagiun e plantas d'iert che vegnan duvrads tant per alimentar ils praschuniers dal stabiliment per l'execuziun giudiziala a Realta sco er per la vendita directa a las consumentas ed als consuments regiunals. Las chasas da producziun e da vendita d'ina autezza da circa 5 meters porschan plazzas da lavur preziusas per radund 20 praschuniers da l'execuziun averta. Las serras cun ina surfatscha da 4300 meters quadrat pon vegnir divididas en 14 unitads. Quai permetta in'utilisaziun flexibla e correspunda als basegns dal manaschi. L'aua da plievgia vegn rimnada en in lajet e duvrada per sauar ils products agrars. Las zonas da traffic servan sco zona da plimatsch energetica da las serras stgaudablas.

Materialias natiralas procuran per in'atmosfera agreabla
L'element central da l'orticultura è il local da vendita e d'elavuraziun en construcziun massiva che correspunda als criteris dal standard Minergie. L'interiur dals locals auts è concepì en construcziun brutta d'industria per gronda part visibla e betg tractada. Tras l'utilisaziun da materialias natiralas e tras l'illuminaziun supplementara vegn creada in'atmosfera agreabla. L'edifizi è survesaivel per las collavuraturas ed ils collavuraturs da l'instituziun e duai facilitar l'incumbensa d'assistenza. L'energia vegn producida en moda centrala sur il stgaudament da stalizzas existent dal stabiliment giudizial avert Realta.

Il stabiliment giudizial elavura e venda ils products da Realta
A Realta vegnan ils products da stagiun lavads, purziunads, sfradentads e preparads per la distribuziun e furniziun respectivamain per la vendita. En il sectur da vendita che sa chatta al sid da l'areal chatta la clientella ina vasta purschida da legums, da fritga e da plantinas. Ultra da quai vegnan vendids mobiglias da lain massiv ed artitgels per regalar producids en ils lavuratoris dal stabiliment giudizial Realta.

70 pertschient da las incaricas da construcziun ad interpresas regiunalas
Ils custs d'investiziun importan 4,9 milliuns francs. Els fan part dal credit d'impegn en l'import da 119 milliuns francs ch'il cussegl grond ha approvà l'avust 2015. Planisà e realisà vegn l'entir project da construcziun dal team da planisaders generals "La Nicca" sut la direcziun dals architects da Cuira Dieter Jüngling ed Andreas Hagmann. Las publicaziuns uffizialas da las lavurs han gì lieu la stad/l'atun 2016. En il rom da la procedura da submissiun realisada han 70 pertschient da las incaricas da construcziun pudì vegnir surdadas ad interpresas regiunalas – la valurisaziun è pia restada per gronda part en la regiun.

FOTO2
FOTO3
FOTO4


Infurmaziuns:
- cusseglier guvernativ dr. Mario Cavigelli, tel. 081 257 36 01, e-mail Mario.Cavigelli@bvfd.gr.ch
- Markus Dünner, architect chantunal, tel. 081 257 36 31, e-mail Markus.Duenner@hba.gr.ch


Gremi: uffizi da construcziun auta dal Grischun
Funtauna: rg uffizi da construcziun auta dal Grischun