Dapi la publicaziun dal model directiv pertutgant la vegliadetgna 2012 per il chantun Grischun sa scuntra il schef dal departament da giustia, segirezza e sanadad dal Grischun cun represchentantas e represchentants dal cussegl grischun da las persunas attempadas per discutar davart temas actuals che sa refereschan a la populaziun pli veglia.

En il rom da la 5avla scuntrada ils 8 da matg 2017 èn vegnidas messas en discussiun tranter auter dumondas areguard il sustegn da persunas che assistan lur confamigliars. Il departament ha mussà detagliadamain ed undrà l'impurtanza da las persunas che tgiran lur confamigliars en la broschura d'infurmaziun dal departament, cumparida l'onn 2015 (www.alter.gr.ch/de/seite/pflegende-angehoerige).

In ulteriur tema da la scuntrada è stà il problem dals letgs da vacanzas che stattan a disposiziun a curta vista. En quest reguard èn ils partenaris da discussiun sa cunvegnids, ch'il cussegl grischun da las persunas attempadas contacteschia en chaussa la federaziun grischuna "chasas ed ospitals" e las regiuns da chasas da dimora. Cusseglier guvernativ Christian Rathgeb ha infurmà las represchentantas ed ils represchentants dal cussegl grischun da las persunas attempadas ch'il model directiv dal departament per la promoziun da la sanadad e per la prevenziun che vegn a cumparair anc questa primavaira vegnia a tegnair quint spezialmain dals interess da la populaziun pli veglia.

Per concepir activamain il futur da la populaziun pli veglia empermetta il cussegl grischun da las persunas attempadas da suttametter al departament fin l'atun 2017 sia visiun 2050 per l'avegnir dal chantun. Las represchentantas ed ils represchentants dal cussegl grischun da las persunas attempadas laudan plinavant il portal d'infurmaziuns da l'uffizi da sanadad "Mussavia per la vegliadetgna Grischun", www.alter.gr.ch, sco er – en general – las activitads preventivas dal departament.

Il cussegl grischun da las persunas attempadas defenda ils giavischs ed ils interess da las persunas pli veglias envers il chantun ed envers la publicitad.


Infurmaziuns:
cusseglier guvernativ Christian Rathgeb, tel. 081 257 25 01, e-mail Christian.Rathgeb@djsg.gr.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad