La cumissiun da gestiun dal cussegl grond (CdG) ha fatg scleriments pertutgant ils conclus da la regenza concernent l'acquist dals dretgs da construcziun e concernent la valurisaziun da l'areal da la resgia gronda Vial-Tuleu a Domat. Ella ha fatg in rapport en scrit en chaussa ed ha surdà quel al cussegl grond.

Sin fundament da ses scleriments arriva la CdG a la conclusiun ch'en il senn da la lescha per promover il svilup economic, concludida dal cussegl grond, aveva la regenza la cumpetenza ed era pia giuridicamain l'ultima instanza cumpetenta per prender conclus concernent l'acquist dals dretgs da construcziun e concernent la valurisaziun da l'areal da la resgia gronda Vial-Tuleu a Domat. Correspundentamain ha la regenza er la responsabladad politica e finanziala. Sche la fatschenta vegn a lunga vista a cuvrir ils custs per las finanzas chantunalas, na po betg vegnir stimà il mument actual. Malgrà ils fatgs incalculabels e las ristgas ch'èn colliads cun il project, constatescha la CdG che las instanzas cumpetentas hajan profità da la schanza che sa mussa areguard l'areal da la resgia gronda. En quest cas na saja quai betg l'incumbensa da la CdG da giuditgar la fatschenta ord vista da la politica economica u da l'economia publica.

En ses rapport al cussegl grond formulescha la CdG propostas e recumandaziuns a la regenza pertutgant duas constataziuns. Quellas concernan per l'ina ina cunvegna davart il rendaquint tranter il chantun Grischun e la vischnanca da Domat e per l'autra l'observanza dal concept da proceder per projects interdepartamentals. Ulteriuras constataziuns da la CdG pertutgan l'applicaziun d'indicaturs e da metodas da l'economia da manaschi e la politica d'infurmaziun. Ord vista da la CdG han ils posts involvids exprimì memia pauc envers il cussegl grond ed envers la publicitad ch'ins n'haja betg cumenzà cun il project pervia da la firma Hamilton, mabain pervia da l'impurtanza per la politica economica respectivamain per l'economia publica, ch'ins ha dà a la valurisaziun da l'areal da la resgia gronda. La fatschenta sco tala na sto perquai dentant betg vegnir messa en dumonda.

Il cussegl grond vegn a tractar il rapport da la CdG en la proxima sessiun da zercladur.

Agiunta:
rapport CdG


Infurmaziuns:
Agnes Brandenburger, presidenta da la cumissiun da gestiun tel. 079 526 82 83


Gremi: cumissiun da gestiun
Funtauna: rg cumissiun da gestiun