La regenza vuless integrar mesiras per la ruta dal San Bernardin en il plan secturial Traffic da la confederaziun. Ultra da quai ha ella approvà la revisiun da la planisaziun locala da la citad da Cuira ed il project per construir ina punt per la via da velos a Zizers.
Per la ruta dal San Bernardin vegnan pretendidas mesiras
La regenza ha prendì posiziun tar il plan secturial Traffic, part Infrastructura da las vias (SIN) da la confederaziun. Cun la SIN vegn cumplettà il plan secturial Traffic. La regenza beneventa la vista generala ch'è ussa avant maun. Quai che manca anc è la relaziun da la SIN cun il fond per las vias naziunalas ed il traffic d'aglomeraziun (NAF) e l'integraziun da 400 kilometers supplementars en la rait da vias naziunalas.
Per il chantun Grischun cuntegna il plan secturial projects concrets en las duas regiuns Partenz/Tavau e Moesa. La regenza sa legra che la renovaziun da la via naziunala N28, Fideris – Küblis Dalvazza, è vegnida integrada en il program da construcziun da las vias naziunalas a lunga vista. Ultra da quai beneventa ella ch'il mez access N13 Grono è cuntegnì en la SIN. In basegn d'agir vesa la regenza percunter en connex cun la via naziunala N13. La ruta dal San Bernardin è la segunda axa da transit impurtanta nord/sid da la Svizra e stat en il center sco alternativa per la ruta dal Gottard. Gia oz vegn la N13 elegida pli e pli las fins d'emna, sch'i dat stretgas e colonnas sin la lingia dal Gottard. Pervia da quai pretenda la regenza mesiras per reducir marcantamain las colonnas e per augmentar uschia la segirezza dal traffic. Ina da questas mesiras è quella d'engrondir la N13 a quatter vials tranter l'access Reichenau/Vial ed il portal sid dal tunnel d'Islabella.
Ultra da quai duai vegnir examinada e realisada ina meglra soluziun per l'access Schiers vest da la via naziunala N28.
Plinavant fa la regenza la dumonda da meglierar la collavuraziun da la confederaziun cun ils chantuns en connex cun l'elavuraziun e cun l'adattaziun futura da plans secturials. L'integraziun dals chantuns duess vegnir optimada e l'urari duess vegnir coordinà en moda pli fidada cun ils chantuns.
Cuira survegn glisch verda per in resort da sanadad
La revisiun parziala da la planisaziun locala da la citad da Cuira dals 5 da zercladur 2016 è vegnida approvada da la regenza cun intginas remartgas e resalvas. Cun questa revisiun parziala vegn tranter auter stgaffida la basa per in resort da sanadad enturn l'ospital Fontana e la Villa Fontana. Per quest intent vegn ina part da l'areal existent per edifizis e stabiliments publics transferida en ina nova zona speziala "resort da sanadad". In'ulteriura finamira da la revisiun parziala da la planisaziun locala da Cuira è la midada da zona tar la plazza da sport a la Ringstrasse. Cun las novas plazzas da sport sin pastget ch'èn previsas a la Obere Au pudess la plazza da sport actuala a la Ringstrasse vegnir duvrada da las scolas. La midada da la plazza da sport en la zona per edifizis e stabiliments publics permetta in'utilisaziun correspundenta.
© Comet Photoshopping ScRL / Dieter Enz
Zizers survegn ina nova punt per la via da velos
La regenza ha approvà il project per construir ina punt per la via da velos cun access sur la Chessirüfe a Zizers. Questa approvaziun è però vegnida concedida cun resalva da la procedura per la permissiun da construcziun da la vischnanca. Plinavant ha la regenza concedì ina contribuziun chantunala da 32 900 francs. L'amplificaziun da la via da velos planisada fa part dal program d'aglomeraziun Cuira approvà. Correspundentamain sa participescha er la confederaziun cun ina contribuziun da 31 000 francs. Planisada è la construcziun d'ina punt per la via da velos d'ina lunghezza totala da 74 meters e d'ina ladezza utilisabla da 3 meters. Confurm a las pretensiuns che vegnan fatgas envers ina colliaziun da traffic quotidian per velos èsi previs d'asfaltar l'entira punt.
Punt actuala per la via da viandar e da velos a Zizers
Sustegn per la sanaziun da la plazza da ballape a Tinizong
Per sanar la plazza da ballape Plaza d'Ava a Tinizong ha la regenza garantì al club da ballape Surses ina contribuziun chantunala da maximalmain 100 000 francs.
La plazza da ballape a Tinizong è en funcziun dapi l'onn 1982. Suenter 35 onns è necessaria ina sanaziun totala. Per ch'i possian vegnir observadas las distanzas minimalas da las varts tenor las directivas da l'associaziun da ballape da la Svizra orientala, vegn la plazza existenta dischlocada per circa 2 meters e vegnan renovads la saiv, l'indriz da sauar e l'illuminaziun. A medem temp vegn mess in pastget ibrid che permetta in'utilisaziun pli intensiva da la plazza.
Gremi: regenza
Funtauna: rg chanzlia chantunala dal Grischun