La regenza ha prendì posiziun tar plirs projects da consultaziun da la confederaziun. Plinavant ha ella approvà ina contribuziun chantunala per in project d'hotel relevant per il sistem a Puntraschigna.

La regenza na vul naginas restricziuns da la "Lex Koller"
"Lex Koller" è la designaziun informala per la lescha federala davart l'acquist da bains immobigliars tras persunas da l'exteriur. Il departament federal da giustia e polizia (DFGP) ha dà en consultaziun in project correspundent.
La regenza grischuna refusa cumplainamain e strictamain la revisiun planisada. Ella menziunescha ch'il project portia dischavantatgs per il chantun Grischun e na saja perquai betg acceptabel. En spezial l'introducziun da restricziuns e d'obligaziuns d'avair ina permissiun per acquistar abitaziuns principalas e stabiliments d'interpresa purtass gronds dischavantatgs ed impediments per l'ulteriur svilup economic e turistic dal chantun Grischun. Gist sco supplement a l'iniziativa cunter las abitaziuns secundaras pudessan talas regulaziuns danovamain avair consequenzas fatalas per noss chantun turistic.
La regenza crititgescha plinavant che la revisiun planisada chaschunass schizunt anc custs supplementars per il chantun. Per quest motiv sto la revisiun vegnir refusada dal tuttafatg. En il project vegnan mess en discussiun er puncts da revisiun ch'il parlament aveva gia refusà en il rom da moziuns.

Link: Consultaziuns dal DFGP

Dapli dischavantatgs che avantatgs tras l'adattaziun proponida per la structura da tariffa TARMED
La regenza refusa la revisiun da l'ordinaziun davart la fixaziun e l'adattaziun da structuras tariffaras en l'assicuranza da malsauns sco ch'ella è vegnida preschentada. Il project da revisiun dal departament federal da l'intern (DFI) prevesa d'introducir cun TARMED ina structura tariffara unitara per l'entira Svizra per prestaziuns medicalas ambulantas. Ina nova soluziun è necessaria, perquai ch'i n'exista pli per il 1. da schaner 2018 nagina structura tariffara che tut ils partenaris da tariffa han fixà cuminaivlamain. La structura tariffara TARMED cumpiglia tut en tut circa 4500 posiziuns tariffaras cun valitaziuns da las prestaziuns medicalas.
La regenza crititgescha che l'adattaziun previsa da la structura tariffara pericliteschia il provediment da la sanadad da las regiuns perifericas dal chantun Grischun ed uschia er il mantegniment dals abitadis decentrals dal chantun. Ella na stgaffescha nagins impuls per medias e medis da chasa da sa domiciliar sco provedidras e provediders da basa sin la champagna. La regenza quinta plinavant che l'intervenziun planisada en las tariffas chaschunass perditas d'entradas da circa 11 milliuns francs per ils ospitals dal chantun Grischun.
Ord vista da la regenza avessan las adattaziuns da la structura tariffara TARMED, ch'èn vegnidas tratgas en consideraziun, plinavant per consequenza che tractaments ambulants indemnisads insuffizientamain vegnissan spustads en il sectur staziunar e ch'ils custs s'augmentassan correspundentamain.
En sia posiziun pretenda la regenza ultra da quai ch'ils respargns da custs cuntanschids tras la revisiun vegnian duvrads per rinforzar il provediment medicinal da basa en las regiuns urbanas sco er perifericas.

Link: Consultaziuns dal DFI

Il sport da prestaziun da juniors duai vegnir reglà da nov
La regenza beneventa il plan d'excorporar – en il rom d'ina revisiun parziala da l'ordinaziun da promoziun dal sport – la promoziun da juniors orientada al sport da prestaziun da l'uffizi federal da sport (UFSPO) a la federaziun da tetg dal sport svizzer (Swiss olympic). Il transferiment dal program da promoziun dal sport Giuventetgna e sport (G+S) è suandabel e gida a separar pli cleramain las incumbensas tranter il UFSPO e Swiss olympic. Uschia s'exprima la regenza grischuna en general positivamain davart il project da revisiun dal departament federal da sport (DDPS).
Cun designar vinavant sco fin ussa sportistas e sportists talentads e cun definir centers da prestaziun naziunals e regiunals è ademplida ina premissa fundamentala per pudair cuntinuar cun instruments da promoziun chantunals etablids. En il chantun Grischun paja il fond da sport chantunal actualmain mintga onn circa 700 000 francs directamain al sport da prestaziun da juniors.
La regenza deplorescha dentant ch'il trenader da juniors da G+S è crudà davent en il rom da la revisiun. Grazia a quest pass intermediar impurtant tranter il manader da G+S e las scolaziuns da trenaders professiunals è la motivaziun da frequentar furmaziuns supplementaras stada bler pli gronda ils ultims onns. La regenza spetga dal UFSPO ch'i vegnian fatgs ils pass necessaris per almain pudair mantegnair la qualitad da scolaziun cuntanschida.

Link: Consultaziuns dal DDPS

Contribuziun chantunala per in project d'hotel relevant per il sistem a Puntraschigna
La regenza ha approvà ina contribuziun chantunala dad 1 milliun francs per la finanziaziun totala da l'hotel Flaz a Puntraschigna. Sin l'areal da las plazzas da sport al nord dal vitg da Puntraschigna duai vegnir realisà in nov hotel al lieu dal restaurant Sportpavillon. L'hotel planisà cun 94 chombras e 188 letgs sa drizza a giasts che na pon – per motivs finanzials – betg sa prestar hotels da la classa da stailas superiura. La purschida da l'hotel è concepida per persunas che fan sport e per famiglias e stat en cumbinaziun cun l'infrastructura da sport ch'è colliada cun la purschida e che vegn renovada da la vischnanca.
Giuditgond la dumonda per ina contribuziun da promoziun è la regenza vegnida a la conclusiun che l'infrastructura planisada haja in caracter relevant per il sistem e possia perquai vegnir promovida correspundentamain. L'hotel Flaz gida a rinforzar il sistem dal turissem regiunal sco er la direcziun strategica da la destinaziun turistica. La vischnanca da Puntraschigna e la regiun Malögia conferman envers il chantun che quest project d'hotel haja ina impurtanza particulara en plirs reguards. Er la purschida da letgs en il segment da 3 stailas ch'è sa reducida fermamain ils ultims onns po vegnir meglierada qua tras.

  

©Stricker Architekten

Augmentà las contribuziuns culturalas per l'Orchester da la Svizra taliana
Ils onns 2018 fin 2020 survegn la Fundaziun per l'orchester da la Svizra taliana (FOSI) contribuziuns annualas da 120 000 francs, totalmain pia 360 000 francs. Dapi l'onn 2013 sustegna il chantun Grischun la FOSI cun contribuziuns annualas dad 80 000 francs. Il motiv per l'augment è il nov contract da collavuraziun tranter la societad svizra da radio e televisiun (SSR) e la FOSI.
L'orchester da la Svizra taliana, ch'è vegnì fundà l'onn 1935 sco orchester da la societad da radio e televisiun da la Svizra taliana, tutga tar ils orchesters sinfonics professiunals ils pli impurtants en Svizra. El n'ha betg mo ina funcziun impurtanta per la furmaziun da l'identitad en la Svizra taliana, mabain è er en vista culturala d'impurtanza per l'entira Svizra.

©Orchester da la Svizra taliana

Duas novas sutgeras per las telefericas a Sursaissa
Per in project da sutgera a Sursaissa conceda la regenza in emprest en il rom da la nova politica regiunala da la confederaziun (NPR). Las Telefericas Sursaissa SA survegnan d'ina vart in emprest NPR dad 1,5 milliuns francs per construir ina sutgera da quatter en il territori Untermatt. Quest emprest sto vegnir restituì entaifer 10 onns. Tar quest project da construcziun vegn remplazzà in runal existent tras ina sutgera accuplabla da quatter da Misanenga ad Untermatt. Sin basa da l'emprest NPR survegnan las Telefericas Sursaissa SA ina contribuziun chantunala da circa 252 500 francs sco uschenumnada prestaziun equivalenta a l'emprest.
Il segund project cumpiglia la construcziun d'ina nova sutgera da sis dad Untermatt a Stein. Er quest stabiliment vegn construì per remplazzar in runal ed ina sutgera existenta. Per la nova sutgera conceda la regenza a las Telefericas Piz Mundaun SA in emprest NPR da 2 milliuns francs che sto medemamain vegnir restituì entaifer 10 onns. La contribuziun chantunala che vegn pajada sco prestaziun equivalenta a l'emprest importa per quest project circa 336 700 francs.

 

©Alping.ch, Gartmann & Joos Bauingenieure SA

Contribuziuns federalas per la tgira dals guauds da protecziun per lung da las vias naziunalas
La regenza ha approvà la cunvegna tranter la confederaziun svizra ed il chantun Grischun concernent la contribuziun per la tgira dals guauds da protecziun 2017 – 2019. La cunvegna regla tranter auter la participaziun da l'uffizi federal da vias (UVIAS) als custs per la tgira dals guauds da protecziun en il chantun Grischun.
Per il 1. da schaner 2008 era la proprietad da la via naziunala vegnida transferida a la confederaziun. Dapi lura sto ella er surpigliar ils custs da construcziun, da mantegniment e da gestiun. Perquai ch'in guaud da protecziun ha ina gronda funcziun da protecziun er per las vias naziunalas, sto la confederaziun er surpigliar ina part dals custs per tgirar quests guauds. Cun excepziun d'emplantaziuns cumpensatoricas u da tagls da segirezza directs gist per lung da la via naziunala n'ha il UVIAS dentant surpiglià fin ussa nagins custs per la tgira dals guauds da protecziun en il chantun Grischun.
Tras la cunvegna approvada resulta ina surfatscha da guauds da protecziun da totalmain 743 hectaras che ston vegnir tgiradas en l'interess dal UVIAS. Per ils onns 2017 – 2019 survegn il chantun Grischun tut en tut circa 1,8 milliuns francs per cultivar quests guauds.

Fixà l'entrada en vigur da la lescha da sanadad
La lescha davart la protecziun da la sanadad en il chantun Grischun (lescha da sanadad) dals 2 da settember 2016 è vegnida messa en vigur per il 1. da schaner 2018. Ultra da quai è vegnida concludida l'ordinaziun tar la lescha da sanadad.
La nova lescha da sanadad remplazza la lescha vertenta che datescha da l'onn 1984 e tegna quint dal svilup che ha gì lieu dapi lura en ils fatgs da sanadad publics. En cumparegliaziun cun la lescha vertenta vegn meglierada la sistematica da la lescha.

Projects da votaziun dals 24 da settember 2017
La regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel la dumengia, ils 24 da settember 2017:
- conclus federal dals 14 da mars 2017 davart la segirezza alimentara (cuntraproposta directa a l'iniziativa dal pievel "Per la segirezza alimentara" ch'è vegnida retratga)
- conclus federal dals 17 da mars 2017 davart la finanziaziun supplementara da la AVS tras in augment da la taglia sin la plivalur
- lescha federala dals 17 da mars 2017 davart la refurma da la prevenziun da vegliadetgna 2020

La dumengia, ils 24 da settember 2017, na vegni votà davart nagins projects chantunals.

Link: Votaziuns en il Grischun


Gremi: regenza
Funtauna: rg chanzlia chantunala dal Grischun