La regenza ha elegì dr. med. vet. Adrian Arquint da Zizers sco nov manader da l'uffizi da chatscha e pestga dal Grischun e sco successur da dr. Georg Brosi.

Adrian Arquint che ha 45 onns vegn a cumenzar sia nova plazza il 1. da favrer 2018. El remplazza il manader actual da l'uffizi da chatscha e pestga che van en pensiun la fin da schaner 2018 suenter esser stà durant 17 onns en questa funcziun.

Adrian Arquint, ch'è naschì e creschì si a Scuol, ha studegià medischina veterinara a l'universitad da Turitg. Suenter differents praticums en praticas da veterinari e suenter ses temp d'assistenza a l'institut per patologia veterinara a Turitg ha el doctorà l'onn 2002 davart il tema "diarrea virala bovina". Tranter ils onns 2002 e 2009 è el stà veterinari d'assistenza per animals pitschens e gronds. L'avust 2009 è el entrà en ils servetschs dal chantun Grischun, nua ch'el ha surpiglià la direcziun da l'inspecturat da la producziun primara tar l'uffizi per la segirezza da victualias e per la sanadad d'animals (USVA). En questa funcziun è Adrian Arquint responsabel dapi lura tranter auter per l'execuziun da la protecziun dals animals en l'agricultura.

Las incumbensas principalas da l'uffizi da chatscha e pestga cumpiglian la cooperaziun tar la concepziun e l'execuziun da la politica federala e chantunala da chatscha e da pestga sco er la protecziun da spezias d'animals periclitadas ed il management dals animals da rapina gronds en il chantun Grischun. Ad Adrian Arquint suttastat la direcziun da circa 70 collavuraturas e collavuraturs ch'èn repartids sin la centrala a Cuira sco er sin dudesch districts da chatscha e sin set districts da pestga.

Fotografia:

Infurmaziuns:
Cusseglier guvernativ Mario Cavigelli, schef dal departament da construcziun, traffic e selvicultura, tel. 081 257 36 14, e-mail Mario.Cavigelli@bvfd.gr.ch


Gremi: regenza
Funtauna: rg departament da construcziun, traffic e selvicultura