La via da velos tranter la plazza da parcar dal fashion outlet Landquart e la rundella da l'access a la A13 è vegnida surdada oz al traffic betg motorisà en il rom d'ina festa d'avertura. La part principala da questa nova via da velos è la punt sur la Landquart, che porscha a las ciclistas ed als ciclists sco er a las pedunas ed als peduns ina colliaziun pli directa vers Landquart.

Cun la festa d'avertura che ha gì lieu oz survegnan la vischnanca da Landquart e la citad da Maiavilla ina nova colliaziun da var 280 meters lunghezza per la via da velos. Questa colliaziun cumenza a la rundella "access Landquart" e maina da nov al vest dals binaris da las VFF – parallelamain cun la Industriestrasse – sur la Landquart fin al parcadi dal fashion outlet. Quest traject da la via da velos ha custà circa 1,7 milliuns francs.

La part principala da questa colliaziun è la nova punt da circa 70 meters lunghezza, che traversa il flum sco er la via d'access a la serenera e che procura per ina via directa vers Landquart. La punt è concepida en furma da bagnola ed ha trais champs. La structura superiura da la punt è d'atschal. Il champ central ha ina lunghezza da var 36 meters, entant ch'ils dus champs a l'ur èn mintgamai 17,3 meters lungs.

La structura superiura da la punt è vegnida preparada en l'ovra en trais parts che paisan mintgamai var 24 tonnas e che han ina protecziun cunter corrusiun. La structura superiura al lieu è vegnida montada durant las notgs dals 30 da matg fin il 1. da zercladur 2017 cun agid da duas cranas sin rodas. Per realisar questa montascha èn las cranas vegnidas installadas sin la punt vischina da la via d'access Landquart a la A13. En ina spezia da tunnel, protegì da l'aura, èn alura las duas colliaziuns da la structura superiura da la punt vegnidas buglidas.

Il project d'exposiziun cumpiglia ultra da quai adattaziuns en il sectur dal sutpassadi sut l'autostrada tranter la rundella "punt da Tardis" e la rundella "access Landquart", il remplazzament dal provisori a la rundella "access Landquart" sco er adattaziuns vi da la via d'access Neugut. Questas lavurs vegnan exequidas probablamain l'onn 2018 sut la direcziun da l'uffizi federal da vias (UVIAS). Medemamain èsi previs d'auzar la via da velos sut ils binaris da las VFF. Quai vegn realisà previsiblamain en connex cun las lavurs da construcziun vi da la staziun da Landquart.

Ulteriuras infurmaziuns davart la nova colliaziun da la via da velos tranter Landquart e Maiavilla chattais Vus en il fegl d'infurmaziun actual da l'uffizi da construcziun bassa dal Grischun.

La punt da var 70 meters lunghezza è vegnida montada en lavur da notg.


Infurmaziuns:
Cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch


Gremi: departament da construcziun, traffic e selvicultura dal Grischun
Funtauna: rg departament da construcziun, traffic e selvicultura dal Grischun