Ir en vacanzas cun l'auto – ed alura spetgar ditg tar in'ampla d'in plazzal. Sche pussaivel na duai quai natiralmain betg capitar. Oravant tut durant il temp principal da viagiar sa stenta l'uffizi da construcziun bassa dal Grischun en spezial da betg impedir il traffic sin las axas las pli impurtantas.

Las mesiras per mantegnair nossas vias da traffic èn displaschaivlamain savens colliadas cun tschertas restricziuns per la circulaziun dal traffic. Perquai dat l'uffizi da construcziun bassa dal Grischun ina gronda paisa a la circulaziun dal traffic tar mintgin dals plazzals. Ils andaments vegnan optimads uschia ch'ils impediments durant la fasa da construcziun per il traffic sin via vegnan reducids tant sco pussaivel.

Per las fins d'emna e durant il temp principal da viagiar vegni dà adatg ch'ils plazzals sin las axas da traffic las pli impurtantas sajan rumids uschè bain sco pussaivel e ch'il traffic possia duvrar da princip dus vials tar ils plazzals. La glista dals plazzals cun infurmaziuns davart las lavurs e davart ils impediments dal traffic po vegnir consultada sin la pagina d'internet www.strassen.gr.ch.

Las interpresas participadas a la construcziun e l'uffizi da construcziun bassa dal Grischun supplitgeschan ils participants dal traffic d'avair la chapientscha duida per eventuals temps da spetga durant las lavurs da construcziun.

Charta detagliada dals plazzals
Glista dals plazzals (PDF)


Gremium: Standeskanzlei Graubünden
Quelle: dt Standeskanzlei Graubünden